HÔSIA 11 - Mara Bible RV (BSI)

Paw kyhpachâna

¹ A hawti no tawhta Izarei cha kyhpachâ na ta; Izi râh liata a y no tawhta, “Ei sawchapawpa” tahpa ta ei aw.

² Awpa ama châ via nahta, Amâ pahla via rili; Bâlâzy lâ atheihna hlâ ei ta, Nothlahpazy lâ hmo ama hlâ tyh.

³ Chatanachôta Epharai cha, Kei ta lâsie pachu na ta; Ama bâh ta ei chaao ei. Châhrasala âmo a patlâhtuhpa cha, Kei ei châ tahpa pahno veih ei.

⁴ Phana chaori ta a chhi ei na ta, Kyhpachâna bâlia ta ei chahry ei. Ama raopaky pahluhpa ei na ta, Âmo lâ a bôh na ta pati ei paniesa ei.

⁵ Kei lâ ama vaw kua khoh leipa vâta, Izi râh lâ kua heih aw ei ta, Asuria cha ama bei a châ aw.

⁶ Zaozi ta ama khihpizy a dyuh aw ta, Ama thokhy chhikao tlâhzy a chhawh pachhô khai aw; Ryh amâ raopa pha leipa vâta A pahleipadia khai aw ei.

⁷ Ei chyhsazy ta Na tleisai khâchâ amâ chhuah haw; Chavâta Chônôchaipa awsao hra ei sala, Âmo cha cheihchalo aw vei.

⁸ Hy Epharai, kheihta ma ei cha thy thei aw? Hy Izarei, kheihta ma chariah ku liata ei cha hlâ thei aw? Kheihta ma Adamâ hawhta ei cha tao thei aw? Kheihta ma Zebôi hawhta ei cha soh thei aw? Ei palôh a vaw nano ha ta, Ei tha eina pasa ha heih chi.

⁹ Ei hiehâhpa ta hmo tao khao leipa aw na ta, Kuahnaopa ta Epharai cha parao khao aw va na. Chyhsapa châ leipa na ta, Khazohpa ei châ; Nama hnohta a ypa Pathaihpa châ na ta, Pathi iapa ta a vy aw va na.

¹⁰ Abeipa cha ama pazi aw; Chakeibarôhneipa hawhta a rôh aw ta, Â rôh tita, A sawzy a chalyuna chôta Notla lâ tawhta amâ vy aw.

¹¹ Pavaw hawhta a chalyupa ta Izi râh tawhta a khy aw ei ta; Vachhuh hawhta a chalyupa ta Asuria tawhta amâ zu aw. Chatanachata ama o chyu lâta ei padisa heih aw ei, Abeipa ta a tah.

¹² Epharai ta haipa bie ta na chadô ta, Izarei chhôhkha ta dôveina ta eina chadô ei. Zudâh deikua cha, Khazohpa nata charei khoh ta, Pathaihpa chô liata ngâchhihpa ta a y.