HÔSIA 10 - Mara Bible RV (BSI)

¹ Izarei cha kre zôh sichâphapa châ ta, A pathei pha ngaita tyh. A pathei hluh via nahta, Maisâh hluh via tao ta; A râh a pha via nahta, Panana tôh a hluh via.

² Ama palôh doleipa vâta, Ama thaileichâna ama phaoh bâ aw. Abeipa ta ama maisâhzy phie aw ta, Ama panana tôhzy a parao aw.

³ Chatawhcha âmo ta, “Abeipa eima chi leipa vâta, Bei hnei ma pi; Bei cha a hneipa rai châ sih la, Khâpa ma miah a taopa thei aw?” ama tah aw.

⁴ Bie hluhpi a chia ei ta, Haipa ta bie a taih ei ta, Biehraizy ama tao. Chavâta pachiana cha, Châmaih sibiepazy hawhta, Lyuzy liata a kaw pyuh tyh.

⁵ Bethave liata viahchaotawzy vâta, Samâri mo amâ chalyu aw; A rônahna ta a puasai hapa vâ ei ta, A chyhsazy ta cha thlu aw ei ta, A theihthaipazy amâ chalyu aw.

⁶ Asuria lâ phaopa châ aw ta, Bei laipa ama pie aw. Epharai cha nozapa ta y aw ta, A khazoh nothlahpa vâta Izarei cha hmiachhiepa ta a y aw.

⁷ Ti chô liata ti buchaphy hawhta, Samâri bei cha a leidia aw.

⁸ Izarei moleina Ave su sâhpazy cha, Paraopa a châ aw. Ama maisâhzy liata Diahsai nata ahlohzy pyuh aw ta, Tlâhpizy hnohta, “Miah vao teh,” tah aw ei ta, Tlâhthlôhzy hnohta, “Miah vi teh,” ama tah aw.

⁹ Hy Izarei, Kibia nohzy tawhna khata molei ha chi ta, Cha liata ama molei lymâ. Chavâta adoleipazy adyuhna chariah ta Âmo cha khazia Kibia liata a pahnie aw veih ei?

¹⁰ Pha ei tahna daihti liata Ei chhorei aw ei; Âmo a dyuh awpa ta, Phopizy a baopasu aw ei ta; Ama moleina a pathopazy vâta, Patupa ama châ aw.

¹¹ Epharai cha viahchao zeinô hrie chiehpa châ ta, Sâh tly a khoh kaw tyh. A rao ngyuhpa liata raopaky paky aw na ta, Epharai ta a haoh aw; Zudâh ta alei palie aw ta, Zakaw ta alei tlo a padi aw.

¹² Na châta siana chi tu la, Kyhpachâna tleih beih leipa thei hria mah y; Na râhmâhpa palie bâ teh. Tahmâ he Abeipa tlua daihti cha a châ hih, Chatanachata a vy aw ta, Na chô liata siana avâ a pasuasa aw.

¹³ Nâma pachâna liata a pahnieh chi ta, Pasaipha hluhpi na hneipa na ngâpa vâta, Moleina lei paliepa ta, Adoleina sâh hria chi ta, Haiphiana theilâpa na nie.

¹⁴ Chavâta na chyhsazy hry liata tymâna vaw pua aw ta, Na thokhy zydua parao khaipa a châ aw. Adyuhna noh liata, Salmâ ta Bethabe a paraopa hawhna khata, Nôzy cha ama sawzy chhaota Taichheihpa ama châ aw.

¹⁵ Chavâta, Hy Bethel, Na moleina rarôh ypa vâta, Cha cha na chô lia a tlô aw. Khih vaw deih aw ta, Izarei bei cha tlokhuh chhawh pathlahpa a châ aw.