HMOTAOPAZY 24 - Mara Bible RV (BSI)

Pawla Felika hmiakô liata

¹ Noh pangawh a khô tawhta, theihthai beichaipa Anania cha machâ thokhazy chhaota za tlô ta, Tertula ama tahpa dâhthaipa chhao a hlao ta. Pawla ama leihna cha râhvaotuhpa hmiakô liata reih ei ta.

² Pawla cha aw papua ei ta, Tertula ta ama leihna bie cha reih ta: “Felika zachhih chaipa, na zawhzi ta thlalôh ngaitapa ta y pi ta, na hmiasai phapa vâta, he phopi châta taopathinazy y ta,

³ kyh to nata su to liata na hmotaopazy a ly ngaitapa ta eimâ pyh tyh.

⁴ Eima cha pahawhpasâh tu lei nawpa ta, bie chyuta eima reih awpa he nôpha kawpa ta miah na nathlie awpa ta eima châ haw.

⁵ He chyhsa he tymâna a taotuhpa, khizaw liata Zu chyhsa zydua a patypahreituhpa nata Nâzari py liata ama hyutuh chaipa pakha a châpa ta eima pahno.

⁶ Achhyna o taihta papuapalei a chhuah ta, chavâta eima patupa a châ.

⁷ Eima ryhpa hawhta pachia a chhuah pi ta, châhrasala pheisaih hyutuhpa Lysia a vy ta, thachahra hmâpa ta eima ku tawhta la ta, a leihtuhpazy cha na hmiakô liata a duah awpa ta biepiepa a tao.

⁸ Nâma tlai ta bie hiahri la, eima leihna zydua ano tawhta na pahno thei aw,” tah ta.

⁹ Zuzy chhao ta, ama leihna cha â dopa tlai a châ tahpa a vaw pykhei ei ta.

¹⁰ Bie reih awpa ta râhvaotuhpa ta ano lâ a ku a thliethlâpa a hmô na ta, Pawla ta a chhy ta, “Kô hluhpi chhôh, he phopi chô liata ryureituhpa na châpa ei pahnopa vâta, thathyu ngaitapa ta ei thaichâna bie ei reih aw.

¹¹ Zerusale liata Khazohpa a chhy awpa ta ei khy tawhta, noh hrawh hleino khô mâh vei, tahpa na pahno thei aw.

¹² Achhyna o liata tlyma, pakhyna ozy liata tlyma, khihpi chhôh liata tlyma, chyhsa ei eichhiapa nata zawpi ei pasyupa ahy hmahta na hmô veih ei.

¹³ Tahmâ chhao, eina leihna bie he â do tlai na tahpa pasia thei aw veih ei.

¹⁴ Châhrasala he bie he na hnohta ei phuah aw. Âmo ta py ama tahpa Lâpi zyhna siezie hawhta miah pathlatuhpazy Khazohpa a chhypa châ na ta, ryhpa nata hrohsopazy châbu liata ropa zydua a ngiapâtuhpa ei châ.

¹⁵ Chyhsa siapa nata sia leipazy thyuheihna a y awpa Khazohpa liata hnabeiseihna a hneipa châ na ta, cha bie cha âmo chhao ta amâ ngiapâpa a châ.

¹⁶ Chavâta Khazohpa nata chyhsapa lâta chhie nata pha pahnona pathaihpa hnei awpa khâ ei chhuah tyh.

¹⁷ Kô hluhpi a khô tawhta, ei chiheihzy deichhyna hmo pie awpa nata atheihna hlâ awpa ta a vy na ta.

¹⁸ Cha hmozy ei tao hai nota, Achhyna o chhôh liata pathaihpa ta na hmô ei ta, zawpizy y leipa ei ta, atymâna chhao y vei.

¹⁹ Cha liata Asia râh tawhta Zu chyhsazy y ei ta, eina leih nawpa ei ama hnei khiahta cha, âmo cha he liata ypa ta, na hmiakô liata eina leih awpa ei a châ.

²⁰ Cha leipa chhao ta, he chyhsazy tlai heta ryureina hmiakô liata ei dua no khata, ei paraopa khâpa ama hmô, reih mawh ei sy.

²¹ Ama hmiakô liata ei dua nota ei reipa bie, ‘Athihpa thyuheihna kyh liata tanoh he nama hmiakô liata a duahpa ei châ hih,’ ei tahpa bie hleikhô ta eina leihna awpa hropa ama pahno khiahta cha, reih mawh ei sy,” tah ta.

Pawla patâhpa a châ

²² Felika cha Lâpi zyhna kyh a pahno kawpa vâta, “Pheisaih hyutuhpa Lysia â zu tita nama bie he ei pachâ aw,” tah ta, ama bie cha soh ha chy ta.

²³ Pheisaih za kha hyutuhpa hnohta Pawla cha patâhna o liata khô chy awpa ta biepie ta. Châhrasala khotalaina khazie rakha ma piepa ta, a viasazy ta ama deichhy awpa pakhâ lei awpa ta biepie ta.

²⁴ Noh khazie tlyma a khô tawhta, Felika cha a lapinô Drusilâ, Zu zuah a vaw chhipa ta vaw tlô ta, Pawla cha paawsa ta, Krista Zisu ngiapâna kyh pareisa ta.

²⁵ Siana kyh nata asohsina kyh nata ryureina a vaw y awpa kyhzy Pawla ta a reih nahta, Felika cha chi ngaita ta, “Vawh chy la, daihti rypaohpa ei hnei tita ei cha aw heih aw,” tah ta.

²⁶ Felika cha Pawla ta tâkâ a pie awpa hnabeiseih ta, chavâta khâ paawsa ta, bie â chho tyh.

²⁷ Kô no a sie tawhta, Felika cha Pôsia Festâ ta a thla ta. Zuzy hry liata moh pha a khohpa vâta, Felika ta Pawla cha patâhna o liata siesai ta.