HMOTAOPAZY 20 - Mara Bible RV (BSI)

Pawla Mâsidônia nata Krikâh liata

¹ Atymâna a pai tawhta, Pawla cha pachupazy paawsa ta, ama thlah palôh ta, a phapa ta a pathlie khai tawh ei ta, Mâsidônia râh lâ sie awpa ta pua ha ta.

² Cha râhzy cha chahryh ta, pasyuna bie hluhpi a rei khai tawhta Krikâh râh tlô ta.

³ Cha liata thla thôh a y tawhta Suria râh lâ balyh ta sie a chhuah ta, châhrasala Zuzy ta thie amâ chhuahpa vâta Mâsidônia râh lâ kua awpa ta tlao a chhuah ha ta.

⁴ Beria khihpa Pyhu sawchapawpa Sôpate, Thysalawnika khihpa Kristaku nata Sekudu, Derbe khihpa Kaiâ, Timawthy, Asia chyhsa Tykiku nata Tarôphimâ zy ta zi ei ta.

⁵ Âmo cha hmia lâta sie ei ta, Tarôsa khih liata miah vaw hâ ei ta.

⁶ Keimo deikua cha viahchhâ thinô pahlao leipa kyhchhi a chhâ tawhta Philipi tawhta balyh ta pua pi ta, ama yna Tarôsa khih cha noh pangawh ta tlô pi ta, cha liata noh sari châh pi ta.

Utyku pathyuna

⁷ Hâta noh hmiatua chaipa liata, viahchhâ eichheih awpa ta eima y pakhy nota, Pawla cha a mylâ sie â chhuahpa vâta, zâcho taihta ama hnohta bie reih ta.

⁸ Eimâ hmaohna ochô chhôhpadâhpa liata meiôh hluhpi y ta.

⁹ Satlia pakha Utyku ama tahpa cha opy liata a tyuh ta. Pawla biereipa a pasi kawpa vâta, a mokupa ta tlauah pathlah ha ta, o chhâh thôhna tawhta tla ta, a thipa ta a huah ei ta.

¹⁰ Pawla cha chô ta, a chô liata a byu thlu ta, a bâh ta a pyh ta, “Nama thlah a pazo khah u, a hroh thlâh ha aw,” tah ta.

¹¹ Pawla cha ochô lâ kiah heih ta, viahchhâ cha eichheih ta, ama nie khai nahta, ama hnohta a pasipi bie reih via heih ta, khih vaw deih pâ ha ta, chatanachata sie ha ta.

¹² Satliapa cha a hrohpa ta a chhi ei ta, thlalôh ngaitapa ta y ha ei ta.

Tarôsa tawhta Miletâ lâ

¹³ Pawla cha phei ta alei lâta sie â chhuahpa vâta, keimo cha balyh lâ zu chhielie pi ta. Asôsa khih pangaipa ta sie pi ta, cha tawhna chata Pawla cha balyh ta a sie hra awpa châ ta.

¹⁴ Asôsa khih liata miah a vaw pahlyh ta, balyh pakiasa pi ta, Mitali khih lâ sie pi ta.

¹⁵ Mitali tawhta balyh ta sie heih pi ta, a mylâ ta Kiôsa liahpahlô dady tlô pi ta. A mylâ ta Samôsa liahpahlô tly pi ta. A mylâ heihpa ta Miletâ khih lâ sie pi ta.

¹⁶ Â thei khiahta cha Zerusale liata Pentikaws noh hmâ awpa ta a sie para khohpa vâta, Pawla cha Asia râh liata bohpi y awpa khoh leipa ta, Ephesi khih cha balyh ta siepakhô a chhuah ta.

Ephesi machâzy hnohta Pawla pasyuna bie

¹⁷ Miletâ tawhta Ephesi lâ chyhsa tuah ta, Awnanopa machâzy ano a vaw hmô awpa ta kei paawsa ta.

¹⁸ Ama vaw tlô nahta, ama hnohta, “Asia râh ei tly tua noh tawhta nama hnohta ei y chhôh zydua ta ei hrozie kha nama pahno.

¹⁹ Areisina chôta Abeipa chakao na ta, Zuzy ta eina teipa vâ ei ta mothlih chhaota nata rietheina chôta ei chakao tyh.

²⁰ Ei bâh pathliah beih leipa na ta, nama châta a phahnai awpa biezy zawpi ahmaohna liata cha pachu ei na ta, o to kiapa ta ei cha pachu tyh ei.

²¹ Zuzy hnohta chhao, Krikâh mo hnohta chhao, ropa ta Khazohpa lâ a heih ta, eima Beipa Zisu Krista a ngiapâ awpa ta ei cha chho tyh ei.

²² “Thlahpa ta eina tuahpa vâta tahmâ he Zerusale lâ ei sie aw. Cha liata ei chô lia khâpa hmo ma a vaw tlô aw tahpa pahno va na.

²³ Khihpi to liata patâhna nata rietheitaonazy ta eina hâ thlâh hapa kyh Thlahpa Pathaihpa ta eina chhopa deita ei pahno.

²⁴ Châhrasala Khazohpa ngiachhiena thâtihpha a châhkhei awpa ta, Abeipa Zisu tawhta ei daopa chakaona rai he ei patlô thei khiahta la, ei hrona he pasô kaw awpa nata ngiabâh tlâh a châpa ta rao va na.

²⁵ “Khinarâh bie chhopa ta ei sielâh tyhpa nâmozy hry liana heta, ahy hmahta ei hmia hmô khao aw veih ei chi tahpa ei pahno.

²⁶ Chavâta chyhsa zydua thisaih liata ei pathaih tahpa tanoh ei cha chho ei.

²⁷ Khazohpa ryhraona zydua nama hnohta phuah khai awpa kyh liata ei bâh pathliah beih va na.

²⁸ Khazohpa Awnanopa sahlao, ano thisaih ta a chaleipazy pasa awpa ta, nâmo nata nama sahlao zydua chô liata a chado teh u. Thlahpa Pathaihpa ta ama chô liata hyutuhpa ta a cha tao ei hih.

²⁹ Ei sie tawhta changie a hrâhpazy nama hry liata a vaw ngia aw ei ta, mietakuzy pahlôh aw vei tahpa ei pahno.

³⁰ Nama hry tawh cheingei chhao ta, pachupazy âmo lâ pabaisa a chhuahpa ta, haipa bie hmâpa ta chyhsa a pasiesachheipazy ama vaw pua aw.

³¹ Chavâta a hrohruapa ta y u la, kô thôh chhôh tlai bâh leipa ta, chhô nah zâ ta mothlih chhaota chyhsa to zikyu ei râ tyhpa kha a thei thlâh ha teh u.

³² “Tahmâ he Khazohpa nata a ngiachhiena bie liata ei cha pavaosa ei. Cha chata cha palaiseihsa aw ei ta, mopathaihpazy hry liata ryuto a cha pahneisa aw ei.

³³ Ahy tâkâ, ngôh nata chysia hmah uahva beih va na.

³⁴ He ei kuzy heta kei nata ei hnohta a ypazy a ngiahpa châta ei hria tyhpa nâmo tlai ta nama pahno.

³⁵ Abeipa Zisu ta, ‘Pietuhpa châpa cha daotuhpa châpa hlâta byhnâ a y via,’ tahpa bie a reipa kha a thei thlâh hapa ta, cha hawhta hriapasapa ta chiehleipazy eima bao awpa a châzie, kao to ta ei cha pamosa tyh ei,” tah ta.

³⁶ Cha biezy cha a rei khai nahta, a pakhu paneih ta, ama zydua châta thlahchhâ ta.

³⁷ Ama zydua ta thata cha ei ta, Pawla cha a pyhpahlypa ta, a pahnâ ei ta.

³⁸ A hmia ama hmô khao lei awpa kyh a reipa vâta ama ngia a chhie pachaipa a châ. Chatanachata balyh taih za pathlie ei ta.