HMOTAOPAZY 18 - Mara Bible RV (BSI)

Pawla Kawrini liata

¹ Cha hmozy hnôhlâ ta, Pawla cha Atheni tawhta pua ta, Kawrini lâ sie ta.

² Cha liata Akuilâ ama tahpa Zu chyhsa pakha hmô ta. Cha chyhsa cha Pawntu râh liata a pihpa châ ta, Klaudia ta Zu chyhsa zydua Rawma khih tawhta pua awpa ta bie a piepa vâta, a lapinô Priskilâ nata Itali râh tawhta atlia ta a vaw tlôpa ama châ. Pawla cha âmo a hmô awpa ta vawh ta.

³ Pawla nata Akuilâ chhôhkha he poh o a taopa châ chyu ei ta, ama raihria â lyupa vâta, Pawla cha Akuilâ nata Priskilâ o liata tlô ta, rai a hriakhei tyh ei.

⁴ Pahânoh maihta pakhyna o liata bie reih tyh ta, Zuzy nata Krikâhzy pahnie â chhuah tyh.

⁵ Mâsidônia tawhta Sila nata Timawthy ama vaw tlô nahta, Pawla cha biechho chakaona liata a hmâh hluh via ta, Zisu kha Mesia a châ tahpa ta Zuzy hnohta â châhkhei tyh.

⁶ Châhrasala Zuzy ta a dyuh ei ta, ama reipachhie nahta, Pawla cha a poh chatho ta, ama hnohta, “Nama thisaih maoh cha nâmo luh liata y mawh sy! Kei deikua la, ei pathaih. Tahmâ tawhta la, Zenitaizy lâ ei sie aw,” tah ta.

⁷ Cha tawhtapa cha pua ta, Titu Zustâ ama tahpa, Khazohpa a chhy tyhpa o liata a ngia ta. A o chhao pakhyna o kiapâh liata a ypa a châ.

⁸ Pakhyna o hyutuhpa Krispâ nata a chhôhkha zydua cha Abeipa a ngiapâ ha ei ta. Kawrini mo hluhpi chhao ta, Pawla biereipa ama thei nahta, a ngiapâpa ta, bâti châ ei ta.

⁹ Zâ kha cha Pawla ta aluahna hmô ta, Abeipa ta a hnohta, “Chi leipa la, a chalih leipa ta bie reih lymâ mah y.

¹⁰ Na hnohta ei y mâh tâh, cha pasasa awpa ta ahy hmahta na chô liata ama ku hy aw veih ei, he khihpi liata chyhsa hluhpi ei hnei,” tah ta.

¹¹ Pawla cha ama hry liata Khazohpa bie pachupa ta, cha liata kô kha nata thla charu y ta.

¹² Kâliô cha Akai râhvaotuhpa a châ nota, Zuzy cha a paraohpa ta Pawla tei ei ta, ryureina hmiakô lâ a chhi ei ta.

¹³ “He chyhsa heta ryhpa chakhiapa ta, Khazohpa a chhy awpa ta chyhsazy a pasyu ei,” tah ei ta.

¹⁴ Pawla cha bie rei awpa â chhuah hai nota, Kâliô ta Zuzy hnohta, “Zuzy saih u, hmo doleipa kyh tlyma, hmo paraopa kyh tlyma châ sala cha, nama leihna he ei pachâ awpa tlai a châ.

¹⁵ Châhrasala biezy, mohzy nata nama ryhpa kyhzy a châpa vâta, nâmo ta pachia thlâh ha teh u. Kei la, cha hawhpa kyh liata pachiatuhpa châ awpa khoh va na,” tah ta.

¹⁶ Chatanachata ryureina tawhta âmo cha papua ha ta.

¹⁷ Ama zydua ta pakhyna o hyutuhpa Sôsthene cha patu ei ta, ryureina hmiakô liata chhei ei ta. Châhrasala Kâliô ta ama hmotaopa cha uasa a chhuah hlei vei.

Pawla Antiôkâ lâ â lie

¹⁸ Cha hnôhlâ ta, Pawla cha Kawrini liata bohpi y via ta, cha khai tawhta unawhzy cha reih phapa ta a chhaih ta, cha tawhna chata Suria râh lâ balyh ta sie ta. Priskilâ nata Akuilâ chhao a hnohta sie hra ei ta. Pawla cha a bietai a patlô hapa vâta, Kenkaria khih liata a sâ a ngyu ta.

¹⁹ Ephesi khih tlô ei ta, cha liata âmo cha siesai ta. Pawla deikua cha pakhyna o liata a ngia ta, Zuzy cha Biehrai a laichadaikhei ta.

²⁰ Châh chy awpa ta a haw ei ta, châhrasala paryhsa leipa ta.

²¹ “Khazohpa ta a pasaih khiahta cha, nâmo lâ ei vy heih aw,” tahpa ta reih phapa ta âmo cha siesai ta, Ephesi tawhta balyh ta sie ha ta.

²² Kaisaria liata balyh â pahâ nota, Zerusale lâ Awnanopa a kaw naoh ta, cha khai tawhta Antiôkâ lâ zu ta.

²³ Cha liata khachâ rakha tlyma a y tawhta, sie heih ta, pachupa sahlao zydua thapatlô laihpa ta, Kalatia râh nata Pharuzia râhzy chahryh ta.

Apawlôsâ Ephesi liata bie a chho

²⁴ Alezandria khihpa Zu chyhsa Apawlôsâ ama tahpa Ephesi lâ a vy ta. Ano cha a pakah paleih a thlâzi kawpa nata Biehrai a pahno kawpa a châ.

²⁵ Abeipa lâpi kyh pachu hapa chyhsa châ ta. Zawhâna bâtina deita a pahnopa chhao ta, thlahpa thapasana hneipa ta, Zisu thâtih â do kawpa ta a pachu tyh.

²⁶ Pakhyna o liata riahpha ngaitapa ta bie reih ta. Priskilâ nata Akuilâ ta a biereipa cha ama thei nahta, ama o lâ a chhi ei ta, Khazohpa lâpi a sia viapa ta chhopasia ei ta.

²⁷ Apawlôsâ cha Akai lâ sie awpa â chhuah nahta, unawhzy ta a thapatlô ei ta, ano a vaw ly awpa ta pachupazy lâ châ ropa ei ta. A tlô nahta, ngiachhiena vâta ngiapâtuhpazy cha thata bao ta.

²⁸ Vâtlâh pahnopa ta Zuzy cha thatlô ngaitapa ta ama bie padei lymâ ta, Biehrai a tlychakapa ta, Zisu cha Mesia a châ tahpa a chhopasia tyh ei.