HLAZY HLA 8 - Mara Bible RV (BSI)

Vâia vâna

¹ Aw, ei rilâhpa hawhta châ la, Ei nô sâhpi a pazypa châ la ei tah kaw dia! Khôtho liata cha hmô aw sah la, Cha pahnâ aw na ta, Ahy hmahta eina reipachhie lei awpa ei tlai.

² Châ chhi aw na ta, Nâ pachu tyhpa Ei nô o liata ei châ ngiakhei ha awpa tlai. Kresawhti ropahâhpa cha padosa aw na ta, Ei pawmikarânâ thei ti ei cha padosa awpa tlai.

³ A ku chavei lâta bâh lô na pahua ta, A ku chachâh lâta einâ pyhpahly.

⁴ Hy Zerusale zuahzy saih u, Bie ei cha pataihsa ei; Ano tlai ta a khoh hlâlei la, Kyhpachâna cha a tha pathyu leipa u la, Pahra hra khuh vy.

⁵ A lôhdupaw a vaw hnieh laihpa ta, Râhchawhpa tawhta â vypa hao ahy ma a châ tly? Epuh kô ry liata cha pahra na ta, Cha liata na nô cha na hnohta sawzeihpa ta y ta, Cha liata châ satuhpa cha sawzeihpa ta a y.

⁶ Na chachôhna liata chahnaona hawhta na soh la, Na ku liata chahnaona hawhta nâ ky mah y; Kyhpachâna cha thina tlu ta a thatlô ta, Hiatliana cha Athihkhih tlu ta â hrâh. Kyhpachâna cha meipaleih hawhta a duah ta, Meipaleih thatlô ngaitapa hawhta a duahpa a châ.

⁷ Kyhpachâna mei cha, Ti hluhpi ta pachhai thei leipa ta, Tisaih chhao ta pamôh thei vei. A o liata a hneina zydua pie khaipa ta, Chyhsa ta kyhpachâna chalei â chhuah khiahta cha, Thata mohnaopa a châ aw.

Viasazy

⁸ Sietanô seihnainô hnei pi ta, A sâhpizy hra cha pabyuh mâh leipa ta. Ano miah ama vaw hia noh liata, Eima sietanô châta khâpa ma eima taopa aw tly?

⁹ Thokhy a châ khiahta cha, A chô liata tâkâ o sâhpa sa aw pi ta; Ochhi a châ khiahta cha, Sidy thophia ta eima dôh aw.

Myuh

¹⁰ Thokhy châ na ta, Ei sâhpizy chhao o sâhpazy ama lyu hih. Chavâta ano mo liata la, Thlalôhna a hneipa hawhta na ei vaw châ haw.

¹¹ Sawlawmaw cha Bâlâhamaw liata kre sadô hnei ta, Mokhâhtuhpazy hnohta hria hlao hneipa ta pahriasa ta, Chyhsa to ta a theilâpa ty châta, Tâkâ tlaw sâh kha ama vaw chei chyu awpa a châ.

¹² Ei kre sadô, keima kre sadô tlai cha ei hmiakô liata a y hih; Hy nâ Sawlawmaw, nâ ta sâh kha hnei la, Theilâpa mokhâhtuhpazy ta za no hnei mawh ei sy.

Myuhneituhpa

¹³ Hy nâ sadôzy liata a pahrâpa y, Viasazy ta na ao ama cha nathlie, Kei chhao na ao thei hraw sah y.

Myuh

¹⁴ Hy ei lôhdupaw, a para teh, Sakhih hawhta châ la; Ropahâhpa tlâhpizy liata, Zuneih tôh lochopa lyu mah y.