HLAZY HLA 7 - Mara Bible RV (BSI)

¹ Pheiky nâ kypa nâ tlai rimâ cha, Hy nôpawpa sawchanô! Na byhpizy thyu phazie cha lôsôhpazy lyu ei ta, Zôthaipa kuzô hawh tlai ta amâ ngia.

² Na paliah cha kresawhti a chhâ beih leipa Biebuh pahlôpa lyu ta, Na py chhao lilipawzy ta chadôpa Sâh pathlupa a lyu.

³ Na sâhpi mianozy cha sakhih taw pô no lyu ei ta, Sakhih taw maphieh tlai ama lyu.

⁴ Na rao cha sianaoh o sâhpa lyu ta, Na mokhaohzy cha Bârabi thokhy chhikao kiapâh ta a ypa, Hesbaw liata tipozy ama lyu. Na hnapasu chhao Dâmaskâ lâ a heihpa, Lebanaw o sâhpa a lyu.

⁵ Na luh cha Kâmel Tlâh lyu ta, Na sâphiehpa cha nohsaihpa hawh a châ. Na sâphiehpazy liata abei â ao haw.

⁶ Hy lôhdunô, khâ a ly chi ta, Na chhithaizie nata na rianaizie rimâ cha!

⁷ Na pôraoh thiahrâ kô lyu ta, Na sâhpizy thiahrâ thei sao a lyu.

⁸ Thiahrâ kô kiah aw na ta, A thei sao ei patu aw tah na ta. Aw, na sâhpizy cha kre saozy lyu ei sala, Na hu roh epuh roh lyu sala,

⁹ Na pakah cha kresawhti pahâh chaipa hawhta châ mawh sy. Ei pakah kresawhti cha, Ei lôhdupaw châta pahnia kawpa ta loh sala, A hmaozy nata a hâhzy chô liata loh zaolao mawh sy.

Myuh

¹⁰ Ei lôhdupaw eih châ na ta, A khona chhao keima châta a châ.

Myuh ta a kyhpachâna a hlâ

¹¹ Ei lôhdupaw, a vy mah y, Râh lâ sie ei sih la, Henâ buhzy hry liata a kei rie khoh suh vy.

¹² Mydi ta kre sadô lâ sie ei sih la, Kre zôhzy ama paw ama pabyuh mâh ma, Kei moh ei sih la; Kre paw lochopa ta, Pawmikarânâ paw a pakai mâh ma, Kei moh ei suh u. Cha liata ei kyhpachâna ei cha hlâ aw.

¹³ Hy ei lôhdupaw y, Khoiahzy ta ropahâhpa papua ei ta, Eima ochhizy kiah liata theilâ pahâhpa to y ta, Theilâ thiehpa nata theilâ hlôpazy, Nâma châta ei cha sopa thlâh ha lah y.