HLAZY HLA 5 - Mara Bible RV (BSI)

Myuhneituhpa

¹ Ei sadô, ei sietanô, ei myuh lâ cha a ngia na ta, Ei deiryh nata ropahâhpa lapakhypa ta, Ei kheihti nata ei kheihthlawh nie na ta, Ei sâhpiti nata ei kresawhti cha ei doh. Hy viasazy, niepa ta, doh u la, Kyhpachâna paripa ta y muh vy!

Viasazy Achhaihna pasazie Myuh

² A zia taraw na ta, Ei palôh deikua â hra thlâh haw. Nathlie tua u! Ei lôhdupaw ta ochhi vaw chakhyh ta, “Hy ei sietanô, ei khochainô, Ei vachhuh, kei châta sia pakinô, Ochhi na vaw pahy teh. Diati ta ei luh padâ ta, Zâ ameih ta ei sâphiehpa a padâ khai ha hih,” tah ta.

³ Ei chysia pahluh ha na ta, Kheihta ma thlai ei tobi heih thei aw? Ei phei a si ha na ta, Khazia ei papua heih aw?

⁴ Ei lôhdupaw cha opy liata a ku vaw chahraoh ta, Ei chhôhso palôh eina hria ngaita.

⁵ Ei lôhdupaw ochhi pahypa awpa ta thyu na ta, Ochhi lâzy chô liata ei kuzy tawhta deiryh a thlaoh ta, Ei kuparozy tawhta deiryh tizy â thlaoh ngâ kaw.

⁶ Ei lôhdupaw cha ochhi pahypa na ta, Châhrasala ei lôhdupaw cha a lie ta, Sihnôh a kua syulyu haw. A bie reipa ta ei palôh pakeichheih ta, Tlua na ta, châhrasala hmô khao va na; Aw na ta, châhrasala na chhy khao vei.

⁷ Khihpi vaituhpazy ta khihpi ama chahlôna liata na hmô ei ta, Na tupa ta, hmah na paphao ei ta; Thokhy vaituhpazy ta ei khuna poh eina hlaipa ei.

⁸ Hy Zerusale zuahzy saih u, Bie ei cha pataihsa ei; Ei lôhdupaw kha nama hmô khiahta cha, Vâiana vâta na a pasa tahpa na vaw chhopa muh vy.

Viasazy

⁹ Hy chanôzy hry liata chhithai chainô y, Khâpa liata ma na lôhdupaw cha mohropazy hlâta a pha via tly? Khâpa liata ma na lôhdupaw cha mohropazy hlâta pha via ta, Cha hawhta bie miah na pataihsa tly?

Myuh ta a khopaw a reithai Myuh

¹⁰ Ei lôhdupaw cha a mo ngyuh ta, A sapati chhao pha kaw ta; Thy kha hry liata â lâ patlua.

¹¹ A luh cha ngôh sua chaipa châ ta, A sâphiehpazy a pako ta, Raawh vyhpa hawhta a vyh pathlie.

¹² A mokhaohzy cha vahtie kao liata vachhuhzy lyu ta, Sâhpiti ta a ngai a si ta, Tipo kiah liata â choh thlâh hapa vachhuhzy a lyu.

¹³ A ôkhaihzy cha ropahâhpa rakhôzy lyu ta, Sibie roh thlôhpa tlâh byuhpazy a lyu. A hmaozy cha lilipawzy lyu ei ta, Deiryh ti a thlaoh ngâpa hmaozy a châ.

¹⁴ A kuzy cha ngôh chôchahreizy lyu ei ta, Beri lôsôhpa pataohpa ngôh chôchareizy tlai ama lyu. A pôhpa cha sianaoh patliepa lyu ta, Saphai lôsôhpazy ta tobipa sianaoh tlai a lyu.

¹⁵ A pheizy cha alabastâ otôhzy lyu ei ta, Ngôh ta taopa patyuna chô liata paduapa, Alabastâ otôhzy tlai ama lyu. A pizie cha Lebanaw lyu ta, Sidy tho pha chaipa a lyu.

¹⁶ Ano cha a reikah a thlôh chaipa châ ta, Kho a pao chaipa a châ. Hy Zerusale zuahzy saih u, Ei lôhdupaw cha ano cha châ ta, Ei viasapa cha ano cha na a châ.