HLAZY HLA 4 - Mara Bible RV (BSI)

Sawlawmaw ta a myuh chhithaina a palyupalih Myuhneituhpa

¹ Âh, nâ ngia tlai na, ei lôhdunô, Na vaw chhithai tlai na! Nâ khuna poh ry liata na mozy vachhuh lyu ta, Na sâ chhao Kilia tlâhzy tawhta a zâ chôpa mie hrizy a lyu.

² Na hâhzy cha ti pasi khai tawhta a vaw puapa, Hmi ngyu duapa mietaku panô zawzy lyu ta, Ama zydua ta maphieh taw pataw chyu ei ta, Ama taw ama pahlei tlâ leipa hawhta a châ.

³ Na hmaozy pala saihlawpa lyu ta, Na pakah chhao kho â chhih ngaita. Nâ khuna poh ry liata na ôkhaihzy cha, Pawmikarânâ patlawpazy a lyu.

⁴ Na rao cha alôzy pachopa ta paduapa Dâvi o sâhpa lyu ta; Cha liata vyhphao sâh kha a bangieh ta, Pasaiphazy vyhphao sai a bangieh.

⁵ Na sâhpi mianozy cha sakhih taw pô no lyu ei ta, Lilipawzy hry liata a tlaihpa Sakhih taw maphieh tlai ama lyu.

⁶ Noh vaw nai ta, Nohawh tlâh a khô hlâlei cha, Deiryh tlâhpi lâ a chhei aw na ta, Ropahâhpa tlâhthlôh lâ ei chhei aw.

⁷ Nâ ngia paki tlai na, ei lôhdunô, Sei nawpa rai hnei va chi.

⁸ Hy keima myuh thieh, ei hnohta Lebanaw tawhta za sie la, Ei hnohta Lebanaw tawhta za sie ha mah y. Amânâ laki tawhta vaw pua la, Seni nata Hâmaw laki tawhta vaw pua mah y. Chakeibarôhneipa lôpuzy tawhta vaw pua la, Keichhoh tlâhpi tawhta vaw pua mah y.

⁹ Hy ei sietanô, keima myuh thieh, Na iah ta ei chhôhso na zai ta, Ei kha eina vaw mopa chi ta, Na pachhih liata lôsôhpa miakha ta, Ei chhôhso a pahnie haw.

¹⁰ Hy ei sietanô, keima myuh thieh, Na kyhpachâna khoiah a vaw hnei rimâ cha! Na kyhpachâna kresawhti hlâta pahâh via syulyu ta, Na sathaw ropahâhpa chhao, Ropahâhpa zydua hlâta a pahâh via.

¹¹ Hy keima myuh thieh, Na hmao tawhta pawti a thlaoh ta, Na paleih ry liata kheihti nata sâhpiti a y; Na chysia roh cha Lebanaw roh a lyu.

¹² Ei sietanô cha sadô khawpa châ ta, Ei myuh thieh cha tihnawh chhie pachhôpa, Tikhaoh pamaipa a châ.

¹³ Na chiahzy cha pawmikarânâ sadô châ ta, Thei pha chaipazy pathei ta, Henâ nata spinâ zy puana sadô a châ.

¹⁴ Spinâ nata iahsamai zy y ta, Basuh ropahâhpa nata lôiasoh zy a y. Ropahâhpa tho to y ta, Deiryh nata lilipaw chhao a y; Ropahâhpa chi to yna sadô a châ.

¹⁵ Tihnawh palina sadô châ ta, Hrona tikhaoh chhao y ta, Lebanaw tawhta vahtiezy lona sadô a châ.

¹⁶ Hy maw thlih, a hra la, Hy chho thlih, a vy mah y! Ei sadô liata vaw pathli u la, A ropahâhpazy charao zaolao mawh sy. Ei lôhdupaw cha a sadô liata a vaw ngia sala, A thei pahâh chaipazy vaw nie mawh sy.