HLAZY HLA 3 - Mara Bible RV (BSI)

Myuh ramâ

¹ Zâ ta khôpheih chô tawhta rohpadypa ta, Lôh rie ei ngiabâh chaipaw cha tlua na ta, Tlua na ta, châhrasala hmô va na.

² Thyu aw na ta khihpi chahryhpa ta, Lâlaizy nata tlyliahzy chahryh laih aw na ta, Lôh rie ei ngiabâh chaipaw cha ei tlua laih aw. Tlua laih na ta, châhrasala hmô va na.

³ Khihpi vaituhpazy ta Khihpi ama chahlô nota na hmô ei ta. “Lôh rie ei ngiabâh chaipaw nama hmô ma?” tah ei na ta.

⁴ Âmo ei khôpa nah ei ta, Lôh rie ei ngiabâh chaipaw cha hmô na ta; Ei hmôpa nahta patu na ta, Ei nô o lâ ei chhi hlâlei cha, Nâ phaohtuhpa chhôhpadâhpa lâ ei chhi hlâlei cha, Pathlie khao va na.

⁵ Hy Zerusale zuahzy saih u, Lyurâh sakhih nata sasu moh ta, Bie ei cha pataihsa ei; Ano tlai ta a khoh hlâlei la, Kyhpachâna cha a tha pathyu leipa u la, Pahra hra khuh vy.

Myuhneituhpa a vaw tlô

⁶ Deiryh nata sathaw ropahâhpa a thu ta, Sôhdaoh liata ropahâhpa paohzy a hniapa ta, Meikhuh a duahpazy hawhta, Râhchawhpa tawhta â vypa hao ahy ma a châ tly?

⁷ Moh tua u, Sawlawmaw amâ syna dyuchhai a châ huh! Pasaipha sycharu ta chadô ei ta, Izarei pasaiphazy ta ama chadô.

⁸ Ama zydua ta zaozi a vao ei ta, Riah tu a thaipa sai ama châ. Ama byhpi liata zaozi a vao chyu ei ta, Zâ chariah chichhihpazy amâ dyuh.

⁹ Bei Sawlawmaw cha Lebanaw tho hmâpa ta, Asyna dyuchhai ano châta a tao ta.

¹⁰ A tôhzy tâkâ ta tao ta, Â hniehna ngôh châ ta, Â tyuna cha poh nohsaihpa a châ. A chhôh cha Zerusale zuahzy ta Kyhpachâna ta ama tobi.

¹¹ Hy Zaio zuahzy saih u, pua u la, Bei Sawlawmaw hao moh tua u. A lapi hnei noh châta a nô ta lakho a pakhopa a kho ta, A palôh thapha noh ta â kho awpa lakho a khopa ta â vy huh.