HLAZY HLA 2 - Mara Bible RV (BSI)

¹ Saraw rôspaw châ na ta, Saikao lilipaw ei châ.

Myuhneituhpa

² Ahlohzy hry liata lilipaw hawhta, Ei lôhdunô chhao laihsazy hry liata â ngia patlua.

Myuh

³ Râhmâhpa thozy hry liata epuh kô hawhta, Ei lôhdupaw chhao satliazy hry liata â lâ patlua. Palôhtlâh ngaitapa ta a nohdi ry liata a tyuh na ta, Ei pakah liata a thei a thlôh ngaita.

⁴ Kyhchhina o lâ nâ chhi ta, Ei chô liata kyhpachâna poh eina zawhpa.

⁵ Kre chawhpa viahchhâ ta tha na patlô la, Epuh ta tha na pathyu mah y; Na vâ cha iapa ta ei pasa hih.

⁶ A ku chavei lâta bâh lô na pahua ta, A ku chachâh lâta einâ pyhpahly.

⁷ Hy Zerusale zuahzy saih u, Lyurâh sakhih nata sasu moh ta, Bie ei cha pataihsa ei; Ano tlai ta a khoh hlâlei la, Kyhpachâna cha a tha pathyu leipa u la, Pahra hra khuh vy.

Myuh ta myuhneituh a pasâhsa

⁸ Cha cha ei lôhdupaw ao a châ chu! Moh teh u, â vy hai, Tlâhpizy chô liata a vaw zaw laih ta, Tlâhthlôhzy chô liata châki a vaw zoh laih.

⁹ Ei lôhdupaw cha sakhih lyu ta, Zuneih tôh dawpa a lyu. Moh teh u, eima pâhchhô a pahlipa ta a duah ta, Opyzy tawhta vaw moh ta, Samokaw tawhta a vaw sai ngâ kaw huh.

¹⁰ Ei lôhdupaw ta bie reih ta, ei hnohta, “Ei kyhpachâpa, kei châta chhithai chainô, Thyu la, vaw kiah bâ mah y.

¹¹ Moh teh, chasipaw chha ha ta, Saopi chhao chhâ ta a khô ha hih.

¹² Alei liata pawpizy a vaw lâ ei ta, Pavaw to sâ daihti vaw tlô ta, Vachhuh tutarunô ao zy chhao eima thei haw.

¹³ Theiku theizy hmoh ei ta, Kre zôhzy vaw pawh ei ta, Ama ropahâhpazy ama pathlisa ngâ kaw bâ hih. Ei kyhpachâ, kei châta chhithai chainô, Thyu la, vaw kiah bâ mah y,” eina tah.

Myuhneituhpa

¹⁴ Hy ei vachhuh, lôpanô keipazy liata a nyu chi ta, Lôkâhpa khuazy liata a y tyhpa y, Na hmia na pahmô la, Na ao na patheisa mah y; Na ao thlôh ta, Na hmia kho â chhih kaw dia!

¹⁵ Eima kre sadôzy ama paw locho daihti châ ha ta, Kre sadôzy a paraotuhpa changiezy miah patupa la, Changie tawzy miah patupa mah y.

Myuh

¹⁶ Ei lôhdupaw cha kei eih châ ta, Kei chhao ano eih ei châ; Ei lôhdupaw cha lilipawzy hry liata A mietaku zawzy a patlaihsa tyh.

¹⁷ Noh vaw nai ta, Nohawh tlâh a khô hlâlei cha, Ei lôhdupaw y, kei lâ a vaw heih la, Sakhih hawhta châ la, Betheri tlâhpizy liata zuneih tôh dawpa lyu mah y.