HLAZY 98 - Mara Bible RV (BSI)

Khazohpa siana reithaina

Reithaina Hla

¹ Abeipa lâ hla thiehpa sa teh u! Ano cha hmonoâhpazy taotuhpa châ ta, A ku chachâh lâ nata a bâh pathaihpa ta pahniena a to haw.

² Abeipa ta a pachhana pahnosa ha ta, Phopizy mohmô liata a siana a palâsa haw.

³ A kyhpachâna tleih beih leipa nata a ngâchhihna cha, Izarei phopi châta a thei thlâh ha ta; Eima Khazohpa pachhana cha, Khizaw kaokih zydua ta ama hmô haw.

⁴ Leilô zydua saih u, Abeipa lâ thaphapa ta awh teh u! Ao paropa ta awh u la, Reithaina hla sa teh u!

⁵ Totâ ta Abeipa reithai u la, Totâ nata ao ngiapa ta ano cha reithai teh u!

⁶ Chiahmie nata saki zy tôpa ta, Abei lâ thaphapa ta awh u la, Abeipa lâ awh teh u!

⁷ Tilaipi nata a chhôh liata a ypa zydua a aoh ei sala, Khizaw nata a chhôh liata a pahrâpazy a rôh mawh ei sy!

⁸ Chavahzy ta ama ku chabaih ei sala, Tlâhpizy ta thaphapa ta hla sa ei sala,

⁹ Abeipa hmiakô liata hla sa mawh ei sy. Abeipa cha khizaw pachia awpa ta â vy. Siana ta khizaw pachia aw ta, Â khopa ta phopizy a pachia aw.