HLAZY 97 - Mara Bible RV (BSI)

Abeipa ryureina

¹ Abeipa ta ryureih ta, Alei a ly sala, Liahpahlô hluhpizy ama thapha mawh sy!

² Meihdo nata zoh kaluhpa ta Abeipa chadô ei ta, Siana nata adona cha a beidyuchhai abôna a châ.

³ A hmia lâta mei sie ta, A chheipâh liata a khakhaipazy a kâ khai ha ei.

⁴ A dôhlazy ta khizaw pakhaih ta, Alei ta hmô ta â chalyu.

⁵ Tlâhpizy kheilôh hawhta Zehôvâh hmiakô liata zao ei ta, Leilô zydua Abeipa hmia liata ama zao khai.

⁶ Avâzy ta a siana phuah ei ta, Phopi to ta a rônahna ama hmô.

⁷ Nothlahpa a chhypa zydua cha, Nozapa ta sopa châ ei ta; Hraoleipa nothlahpa a palaikheipazy chhao, Nozapa ta sopa ama châ. Nâmo, khazoh zydua saih u, Ano a chhy muh vy.

⁸ Hy Abeipa, na pachianazy cha, Zaio ta thei ta a tha a pha ngaita; Zudâh sawchanôzy a lypa ta ama y.

⁹ Hy Abeipa, nâ cha alei chô zydua liata chônôchaipa châ chi ta, Khazoh zydua chô lâta cheihchalopa na châ.

¹⁰ Nâmo, Abeipa kyh a pachâtuhpa zydua saih u, Moleina a hao muh vy; Ano cha a mopathaihpazy hrona pabohsa ta, Hmoparaopazy ku tawhta a pachhatuhpa a châ.

¹¹ Mosiapa châta khaihna piepa châ ta, Palôh dopa châta alyna piepa a châ.

¹² Hy mosiapazy saih u, Abeipa liata a ly u la, A moh pathaihpa reithai teh u.