HLAZY 96 - Mara Bible RV (BSI)

Khazohpa pathaihna reithaina

¹ Abeipa lâ hla thiehpa sa u la, Leilô zydua saih u, Abeipa lâ sa teh u!

² Abeipa lâ hla sapa ta a moh reithai u la, Noh chareih a pachhana bie chho teh u.

³ Râhzy liata a rônahzie phuah u la, Phopi zydua hnohta a hmotao noâhpazy phuah teh u!

⁴ Abeipa cha rônah ta, Thata reithai awpa châ ta, Khazoh zydua hlâta chi chai awpa a châ.

⁵ Phopizy khazoh zydua cha nothlahpazy dei châ ei ta, Abeipa deikua cha avâzy a taotuhpa a châ.

⁶ A hmiakô liata rônahna nata abeina y ta, A supathaihpa liata thatlôna chhithaina a y.

⁷ Phopizy liata chi to saih u, Abeipa cha reithai u la, Abeipa cha rônahna nata thatlôna patosa teh u!

⁸ Abeipa cha a moh rônahna patosa u la, Hmohlâpa cheipa ta a dôhpachhôh tlyhmia lâ a vy teh u!

⁹ Rônahna nata pathaihna ta Abeipa cha a chhy u la, Leilô zydua saih u, a hmiakô liata a chalyu teh u!

¹⁰ Râhzy liata, “Abeipa ta ryu a reih! Khizaw he â ipa ta paduapa châ ta, A chalyu beih aw vei; Â khopa ta phopizy a pachia aw,” tah teh u.

¹¹ Avâzy ama thapha sala, Alei a ly mawh sy! Tilaipi nata a chhôh liata a ypa zydua a aoh ei sala,

¹² Lyu nata a chhôh liata a ypa zydua a ly mawh ei sy! Cha tina cha râhmâhpa liata tho zydua chhao, Thaphapa ta hla sa ei sala,

¹³ Abeipa hmiakô liata hla sa mawh ei sy. Abeipa cha a vy ta, Khizaw pachia awpa ta â vy. Siana ta khizaw pachia aw ta, A ngâchhihna ta phopizy a pachia aw.