HLAZY 90 - Mara Bible RV (BSI)BU PALIHNA ( Hla 90—106 ) Tlyzaw Khazohpa nata chyhsapa Khazohpa chyhsa Mawsi Thlahchhâna 1 Abeipa, nâ cha chhâ zydua ta, Eima pahrâna na châ. 2 Tlâhpizy ama y hlâta y ha chi ta, Leilô nata khizaw zy na padua hlâ chhao ta na y haw; Chhâzaw nata tlyzaw ta Khazohpa na châ. 3 Chyhsapa cha dohlei lâ pakuasa tyh chi ta, A hnohta, “Hy chyhsa saw saih u, Dohlei lâ kua heih teh u!” na tah tyh. 4 Na mohmô liata cha kô sâh kha he, Zâhnia noh a khôpa hawh châ ta, Zâ vaih khana chhôh hawh dei a châ. 5 Tisaih hawhta âmo cha phaoh pathlah chi ta, Ramâ hawhta lei ei ta, My sibie hrohpa hawh dei ama châ. 6 My ta hroh silipa ta kaw thyu ta, Zâlâ ta uah ta a raoh ha tyh. 7 Na hiehâhna ta miah nie khai ha ta, Na pathiiana vâta ngiarohpa ta eima y. 8 Eima paraonazy na hmiakô liata soh chi ta, Arulâta eima moleinazy chhao, Na hmia khaihna liata na soh tyh. 9 Na pathiiana ry liata eima noh zydua lei ta, Ahrôna ta eima kôzy eima pachhâ tyh. 10 Eima hro chhôh kôzy cha kô sysari châ ta, Thatlôna vâta kô sycharie chhao a châ thei; Châhrasala hro pasina cha hriapasana nata pachârôhna dei châ ta, Thlai lei ei ta, keimo chhao eimâ zaw syulyu tyh. 11 Ahy ma na hiehâhna hmotaotheizie pahno ta, Chi nâ chhihna nata na pathiiana chichhihzie a pahno tly? 12 Sona palôh eima hnei thei nawpa ta, Eima hro chhôh nohzy reizie awpa miah pachu mah y! 13 Hy Abeipa, vaw kua mah y! Khachâ ma na hie a hâh aw tly? Châ chakaotuhpazy chô liata thapasana hnei mah y! 14 Na kyhpachâna tleih beih leipa ta, My chareih lôhrâ miah patlô la; Chatanachata eima hro chhôh noh zydua liata, Alypa nata thaphapa ta eima y lymâ aw. 15 Pasa miah na pataosana noh zie ta, Thaphana miah pie heih la; Chhiena eimâ tyhna kô zie ta, Thaphana miah pie heih mah y. 16 Châ chakaotuhpazy ta na hmotaopa hmô ei sala, Ama pathlazy ta na hmotaotheina rônahpa hmô mawh ei sy! 17 Abeipa eima Khazohpa khokheina eima chô liata y sala, Eima ku raihria eima chô liata pa-i mawh sy. A châ na, eima ku raihria pa-i mah y. |