HLAZY 86 - Mara Bible RV (BSI)

Khazohpa zawngiahna hiana

Dâvi Thlahchhâna

¹ Hy Abeipa, kei lâ na nah vaw pachôh la, Nâ chhy mah y; Dyhchhiepa nata phahlapa ei châ hih.

² Khazohpa a pachâpa châ na ta, Ei hrona he pahlôh mah y; Ei Khazohpa châ chi ta, Nâma châ ngâpa he pachha la, Châ chakaotuhpa he pachha mah y.

³ Hy Abeipa, noh y ta cha pado na ta, Na ngiachhie mah y!

⁴ Hy Abeipa, nâ lâta ei hro kaw chaluah na ta, Châ chakaotuhpa hro he palysa mah y!

⁵ Hy Abeipa, nâ cha Khazoh phapa nata a ngiahthai theituhpa châ chi ta, Châ padotuhpazy chô liata zawngiahna a hnei hluh ngaitapa na châ.

⁶ Hy Abeipa, ei thlahchhâna lâ na nah vaw pachôh la, Ngiachhie ei châ hawna ao he nathlie mah y.

⁷ Einâ chhy awpa vâ chi ta, Ei nôpona noh liata ei cha pado tyh aw.

⁸ Hy Abeipa, khazohzy hry liata nâ hawhpa rai y leipa ei ta, Na hmotaopa hawhta a taopa rai y veih ei.

⁹ Hy Abeipa, phopi na taopa zydua a vy aw ei ta, Na hmiakô liata a bôhpa ta, Na moh ama palyupalih aw.

¹⁰ Nâ cha rônahpa nata hmonoâh taotuhpa châ chi ta, Nâma deita he Khazohpa na châ.

¹¹ Hy Abeipa, na biehmeiseihpa liata ei y thei nawpa ta, Na lâpi na pachu la; Na moh ei chi thei nawpa ta, Palôh a ipa na pie mah y.

¹² Hy Abeipa ei Khazohpa, Ei palôh zydua ta alyna bie cha hlâ na ta, Chhâzaw ta na moh ei parônahsa aw.

¹³ Kyh eina pachâna chi he rônah ta, Athihkhih ry chaipa tawhta ei hro na pachha haw.

¹⁴ Hy Khazohpa, chyhsa a khotlâhpazy ta na thyuhnao ei ta, Chyhsa nôchhiepa sahlao ta ei hrona pahlei amâ chhuah; Ama hmia lâta nâ cha soh veih ei.

¹⁵ Châhrasala Hy Abeipa, Nâ cha zawngiahna nata ngiachhiena a hneipa Khazoh châ chi ta, A hiehâh a rupa nata kyhpachâna nata ngâchhihna ta a biepa Khazoh na châ.

¹⁶ Kei lâ a vaw heih la, Na ngiachhie mah y; Châ chakaotuhpa he na thatlôna pie la, Châ chakaotuhnô sawchapapawpa he pachha mah y.

¹⁷ Hy Abeipa, na baopa ta, Thlah na palôh ha chi ta, Na khokheina ngiana na pahmô mah y; Nâ haotuhpazy ta hmô ei sala, Hmiachhiepa ta ama yna hâh ta.