HLAZY 84 - Mara Bible RV (BSI)

Khazohpa o vâna

Hla chhituhpa châta: Kiti ao ta sa awpa. Kôrâ Sawchapawzy Hla

¹ Hy Pheisaihzy Abeipa, Na byureihzy cha kho â chhih kaw dia!

² Ei hro ta Abeipa dôhpachhôh tlyhmiazy vâ ngaita ta, A panao khai haw; Ei palôh nata ei sapa zy ta, Kha­zohpa hrohpa lâ alyna hla ama sa.

³ Hy Pheisaihzy Abeipa, Ei Beipa nata ei Khazohpa, Na maisâh kiapâh liata la, Boby hmahta o hnei ta, Siviah chhao ta bu a hnei, A tawzy so nawpa ta.

⁴ Na o liata a pahrâpazy cha ama nohlao na, Chhâzaw ta ama cha reithai aw. Selah

⁵ Nâma liata ama thatlôna a ypazy nohlao ei ta, A palôh liata Zaio pangaina lâlai a ypazy cha ama nohlao na.

⁶ Bâkâ Saikao hipa ama siepahlie nota, Tihnawhzy yna su ta tao ei ta; Vâsua hmiatuapa ta pabie ta, Tipozy lâta â lie tyh.

⁷ Sie ei ta ama thatlô via rili ta, Zaio liata Khazohpa hnohta amâ luah hlâlei ama sie lymâ.

⁸ Hy Zehôvâh Khazohpa Atotaotheipa, Ei thlahchhâna he thei la; Hy Zakaw Khazohpa y, Nah vaw pachôh mah y! Selah

⁹ Hy Khazohpa, eima vyhphao he moh la, Na sathawthupa hmia he sai tua!

¹⁰ Na dôhpachhôh tlyhmia liata noh kha ypa cha, Su hropa liata noh sâh kha ypa hlâta a pha via. Moleipa poh o liata pahrâpa hlâta cha, Ei Khazohpa o chhikao vaituhpa châ awpa ei khoh via.

¹¹ Zehôvâh Khazohpa cha noh nata vyhphao châ ta, Abeipa cha khokheina nata palyupalihna a pietuhpa a châ. Âdopa ta a ypazy châta cha, Hmo phapa thlyu aw vei.

¹² Hy Pheisaihzy Abeipa, Nâma châ ngâtuhpa cha a nohlao na!