HLAZY 83 - Mara Bible RV (BSI)Chariah pahniena châta thlahchhâna Asâpha Hla 1 Hy Khazohpa, a chalih leipa la, Hy Khazohpa, a thlih thlâh ha leipa la, Y molo cheita khah y! 2 Moh tua, na chariahpazy palopasah ei ta, Châ haotuhpazy ama luh ama pachhua. 3 Na phopi he piehpie kawpa ta tei ei ta, Na ryusôhpazy a dyuh awpa ta amâ patlapasao. 4 “A vy u la, ama phopi he pamua ha ei suh u; Izarei moh he a thei thlâhpa ta y khao khah sy!” ama tah. 5 Reih kha tlapa ta cha tei ei ta, Châ dyuh awpa ta biehrai ama tao. 6 Chazy cha Edômâ nata Ismela mo poh ozy, Môabâ nata Hâkari mozy, 7 Kebâli mo, Amawna mo nata Amale mozy, Philistinâ mo nata Tyre mozy châ ei ta, 8 Asuria mo chhao ta âmo amâ pazao; Âmo he Lawta pathla bâh thatlôpazy ama châ. Selah 9 Midia mo chô liata na taopa hawhna khata, Ama chô liata tao la; Kisaw chavah liata Siserâ nata Zabi chô liata na taopa hawna khata, Ama chô liata tao hra mah y. 10 Âmo cha Enadaw liata pahleipadiapa châ ei ta, Chhaohlei châta ie hawh dei ama châ haw. 11 Ama nôpawpazy cha, Ôrebâ nata Zibâ hawhna khata tao la; Ama beimachâ zydua cha, Zebâ nata Zalmunâ hawhna khata tao mah y. 12 Âmo cha, “Khazohpa sibiepa suzy he, Keimo châta a la ei suh u,” A tahtuhpazy kha ama châ. 13 Hy ei Khazohpa, âmo cha doh khupa hawhta tao la, Thlih hmia liata sâh sihpa hawhta tao mah y. 14 Mei ta râhmâhpa a kâpa hawhta, Meipaleih ta tlâhpizy a charôhpa hawhta, 15 Âmo cha na thlihpipa ta a chadai la, Na chothyu ta pachisa mah y! 16 Hy Abeipa, na moh ama tlua thei nawpa ta, Ama hmia cha nozana ta pabie mah y. 17 Chhâzaw ta nozapa nata ngiarohpa ta y ei sala, Nohzaopa ta leidia mawh ei sy. 18 Nâ deita he Zehôvâh moh a phaohpa châ chi ta, Khizaw zydua liata Chônôchaipa na châ tahpa ama pahno aw. |