HLAZY 8 - Mara Bible RV (BSI)Khazohpa moh rônahna Hla chhituhpa châta: Kiti ao ta sa awpa. Dâvi Hla 1 Hy Abeipa, eima Zibeipa, Alei chô zydua liata na moh a rônah kaw dia! Avâzy chô lâna khi ta na rônahna soh chi ta, 2 Chariahpa nata phuh latuhpazy padiahpa ta, Na khakhaipazy pahnie nawpa ta, Hawtipa nata hawsaihpazy pakah tawhta thatlôna na papua. 3 Na kuzô avâzy moh na ta, Ama su chyu liata na sopa thlâpâ nata awhsizy ei sai châh ta, 4 Chyhsapa he khâpa châ ta ma, Pachâ kaw chi ta; Chyhsa sawchapawpa he khâpa châ ta ma, Na mohôh tly? 5 Ano cha vâmozy hlâta a chyhta a hnai viapa ta tao chi ta, Rônahna nata palyupalihna lakho na pakho. 6 Na ku hmotaopazy chô liata biehneina piepa ta, A phei ry liata hmo to soh chi ta, 7 Mietaku nata viahchao zydua, Râhsa zydua chhao, 8 Avâ pavawzy nata tilaipi ngazy, Tilaipi lâpizy liata a siepa zydua, A phei ry liata na so khaipa a châ. 9 Hy Abeipa, eima Zibeipa, Alei chô zydua liata na moh a rônah kaw dia! |