HLAZY 77 - Mara Bible RV (BSI)

Nôpo daihti ta Abeipa padona

Hla chhituhpa châta: Zeduthu ao ta sa awpa. Asâpha Hla

¹ Ao paropa ta Khazohpa lâ awh na ta, Khazohpa lâ tlai cha ao paropa ta ei awh; Kei lâta a nah a pachôh aw.

² Ei nôpona noh liata Abeipa tlua na ta, Zâ ta chhao ei ku pathla leipa ta ei pazawh lymâ; Ei hro he thlapalôh thei awpa châ khao vei.

³ Khazohpa ei thei châh ta, A hrô na ta; Ei pachâ châh ta, Ei thlahpa tha a chhâ tyh. Selah

⁴ Mo paso lei awpa ta na tao chi ta, Nôpopa ta bie chhao reih thei khao va na.

⁵ Hlâno daihtizy rohpady na ta, Kô hluhpi a khô hapazy ei pachâ tyh.

⁶ “Zâ ta ei hla a thei sah la, Ei palôh ta pachâ tua sah,” tah na ta, Chatanachata ei thlahpa ta pakhâta ta a tlua:

⁷ “Abeipa ta chhâzaw ta a thy pathlah aw ma? Khokheina palâsa beih khao aw vei ma?

⁸ A zawngiahna a chhâ pathlah ha aw ma? A bietai chhâ zydua châta a rao ha aw ma?

⁹ Khazohpa ta ngiachhiena hnei awpa a my ha ma? Hiehâhna ta ma a thapasana a khaw haw?” Selah

¹⁰ Chatawcha ei palôh liata, “Chônôchaipa ku chachâh lâta hmo a tao khao leipa he, Keima adoleina vâta a châ,” tah na ta.

¹¹ Abeipa hmotaopazy a thei thlâh ha aw na ta, A châ na, hlâno ta na hmonoâh taopazy ei thei thlâh ha aw.

¹² Na raihria zydua pachâ aw na ta, Na hmotao thatlôpazy ei laichadai aw.

¹³ Hy Khazohpa, na lâpi cha a pathaih tlai na; Eima Khazohpa hawhta a rônahpa khazoh hropa ahy a y?

¹⁴ Nâ cha hmonoâhpa a taotuhpa Khazohpa châ chi ta, Phopizy hry liata na thatlôna na palâsa haw.

¹⁵ Na bâh ta na phopi chatlai chi ta, Zakaw nata Zawsi pathlazy na chatlai ha ei. Selah

¹⁶ Hy Khazohpa, tizy ta cha hmô ei ta, Tizy ta ama cha hmô nahta chi ngaita ei ta, Ti athupazy taihta amâ chalyu.

¹⁷ Meihdozy ta ti za patlai ei ta, Avâzy ta tôkalôhpa pathuasapa ta, Na châtaizy su to liata ama pathlie.

¹⁸ Na tôkalôhpa pyu cha khisô liata y ta, Na dôhlazy ta khizaw pakhaihsapa ta, Alei he a chalyu ta â chatho.

¹⁹ Na lâpi ta tilaipi siepahlie ta, Na lâthlôh ta ti lai ngaitapazy a siepahlie; Chatanachôta na pheihniezy hmô awpa y vei.

²⁰ Mawsi nata Arawna ku ta, Mietaku zaw hawhta na phopi na chhihtha.