HLAZY 75 - Mara Bible RV (BSI)

Khokhei viapa a hnei leipa Khazohpa ryureina

Hla chhituhpa châta: “Pahleipadia Khah Y” tahpa ao ta sa awpa. Asâpha Hla

¹ Hy Khazohpa, alyna bie eima cha hlâ; Na moh â hniapa vâta alyna bie cha hlâ pi ta, Na hmonoâh taopa kyhzy eima phuah.

² Nâ ta, “Daihti ei raopa liata, Â dopa ta ei pachia aw.

³ Alei nata a chô liata a ypa zydua â chalyu nota, A tôhzy a patutuhpa cha keima ei châ. Selah

⁴ A khotlâhpazy hnohta, ‘A khotlâh khah u,’ tah na ta, Hmoparaopazy hnohta, ‘Nama kizy chaluah khah u,’ ei tah.

⁵ Nama ki â sâhpa ta chaluah leipa u la, Nama rao pachhuapa ta bie reih khuh vy,” tah chi ta.

⁶ Chyhsapa cheihchalona cha, Nochhi lâ tawhta a zu leipa ta, Notla lâ tawhta a khy hra leipa ta, Râhchawhpa tawhta a vy hra vei.

⁷ Pachiatuhpa cha Khazohpa châ ta, Ano ta pakha panawhsa ta, Pakha a cheihchalo tyh.

⁸ Abeipa ku liata cha, Kresawhti pahâhpa nyu a y; Kresawhti cha a buchaphy pua ngâ ta, Abeipa ta patlai ta, Khizaw liata moleipa zydua ta doh ei ta, A chaopahrâ taihta ama doh khai haw.

⁹ Kei deikua cha, Zakaw Khazohpa thâtih khâ phuah aw na ta, Ano reithaipa ta ei sa aw.

¹⁰ Moleipa ki zydua tai pachhô aw na ta, Mosiapazy ki deikua cha chaluahpa a châ aw.