HLAZY 72 - Mara Bible RV (BSI)Bei siapa abeina Bei Sawlawmaw châta Dâvi thlahchhâna hla 1 Hy Khazohpa, abei hnohta na ryureina dopa pie la, Abei sawchapawpa hnohta na siana pie mah y! 2 Na phopi chô liata siana ta ryureih sala, Dyhchhiepazy chô liata adona ta ryureih mawh sy! 3 Tlâhpizy ta na phopi châta sivâphana papua ei sala, Tlâhthlôhzy ta adona byhnâzy papua mawh ei sy! 4 Râhsaw dyhchhiepazy a duakhei sala, Phahlapa sawzy pachhapa ta, Tlybaituhpazy chanaoh mawh sy! 5 Noh a y chhôh zydua ta cha chi ei sala, Thlâpâ y chhôh zydua cha chipa ta, Chhâ zydua ta cha chi mawh ei sy! 6 Abei cha sibie thlyupa chô liata vâsua hawhta châ sala, Alei a baopa khihti hawhta châ mawh sy! 7 Ano hro chhôh nohzy liata cha, Chyhsa siapazy a sosâh ei sala, Thlâpâ a lei hlâlei cha, Sivâphana thata y mawh sy! 8 Tilaipi tawhta tilaipi taihta biehnei sala, Chavah tawhta alei chhâna taihta biehnei mawh sy! 9 Râhchawhpa chiphozy a hmiakô liata a bôh ei sala, A chariahpazy cha dohlei palie mawh ei sy! 10 Tâsi nata liahpahlô beizy ta ano lâ râhpaw pie ei sala, Sebâ nata Sibâ beizy ta kuhriazy pie mawh ei sy! 11 Bei zydua ta a hmiakô liata a bôh ei sala, Râh zydua ta ano cha chakao mawh ei sy! 12 Ano cha phahlapa ta a aw tita, A pachhatuhpa châ ta; Baotuh hnei leipa dyhchhiepa ta a aw tita, A pachhatuhpa a châ. 13 Chiehleipa nata phahlapazy ngiachhie ta, Phahlapazy hrona a pachha. 14 Tlybaina nata thachahra hmâna tawhta ama hrona chatlai ta, A mohmô liata ama thisaih a sôh ngaita. 15 Abei cha hroh pareih sala, Sebâ ngôh piepa châ mawh sy! Ano châta khâ thlahchhâ ei sala, Noh y ta byhnâ awpa mawh ei sy! 16 Râh liata kô thata veih sala, Tlâhpizy liata sâh a chanei mawh sy. A thei cha Lebanaw hawhta châ sala, Khihpi chyhsazy chhao lyurâh sibiepa hawhta, Ama paw pakai mawh ei sy. 17 A moh chhâzaw ta y sala, Noh a chhi chhôh zydua cha, A moh pathâh lymâ mawh sy! Phopi cha ano liata byhnâ topa ta y sala, Râh zydua ta ano cha nohlaopa tah mawh ei sy! 18 Abeipa, Izarei Khazohpa cha, Reithaipa ta y mawh sy; Ano deita he hmonoâhpazy taotuhpa a châ. 19 A moh rônahpa cha chhâzaw ta reithaipa ta y sala, Leilô zydua he a rônahna ta bie mawh sy! Amen! Amen! 20 Zese sawchapawpa Dâvi thlahchhânazy cha, He liana heta a chhâ haw. |