HLAZY 71 - Mara Bible RV (BSI)

Machâpa thlahchhâna

¹ Hy Abeipa, nâ châ chhai na ta, Maophyuhpa ta na paysa khah y!

² Na siana vâta na pachha la, Na papua mah y; Kei lâ na nah vaw pachôh la, Na pachha mah y!

³ Khâ ei pangai tyh awpa, Ei chhaina lôpanô na châpa la; Ei lôpanô nata ei thokhy châ chi ta, Na pachha awpa ta biepie mah y.

⁴ Hy ei Khazohpa, moleipa ku tawh­ta na pachha la, Chyhsa chhiepa nata adoleipa ku tawhta na pachha mah y.

⁵ Hy Abeipa, nâ cha ei hnabeiseihna châ chi ta, Hy Abeipa, ei hawti no tawhta ei ngâchhâpa na châ.

⁶ Chhi tawhta nâ liata a pahnieh na ta, Ei nô py tawhta nâ latuhpa na châ. Khâ ei cha reithai aw.

⁷ Chyhsa hluhpi châta ngiana châ na ta, Châhrasala nâ cha ei chhaina thatlôpa na châ.

⁸ Ei pakah he nâma reithaina ta bie ta, Nâma palyupalihna ta noh y ta a bie.

⁹ Ei machâ tita na thy leipa la, Ei tha â sy tita na siesai khah y.

¹⁰ Ei chariahpazy ta ei kyh na reih ei ta, Ei hrona a byhtuhpazy a pachia ei ta,

¹¹ “Khazohpa ta a siesai haw, A chadai u la patu teh u; A pachha awpa y khao veih ei,” ama tah.

¹² Hy Khazohpa, nâ hla leipa la, Hy ei Khazohpa, na bao awpa ta a para mah y!

¹³ Nâ leihtuhpazy maophyuhpa ta leidia ei sala, Pasasa nâ chhuahpazy cha, Mohnaona nata nohzaona ta khu mawh ei sy.

¹⁴ Kei deikua cha hnabeiseihpa ta khâ y aw na ta, Ei cha reithai via rili aw.

¹⁵ Ei pakah ta na siana bie chho aw ta, Na pachhana bie noh y ta a chho aw, A chhozie awpa ei pahno thai leipa chhao ta.

¹⁶ Hy Abeipa Zehôvâh, Na hmotao rônahpa reithaipa ta a vy aw na ta, Na siana ei phuah aw, Nâma siana tlai cha ei phuah aw.

¹⁷ Hy Khazohpa, ei hawti no tawhta na pachu chi ta, Tanoh taihta na hmotao noâhpazy ei phuah lymâ.

¹⁸ Chavâta Hy Khazohpa, Machâpa nata sâ pawhpa ei châ tita, Na siesai khah y; Chhâ a vaw y awpa hnohta na thatlôna ei phuah hlâlei cha, Na siesai leipa la; Miah a vaw pazi awpazy hnohta Na hmotaotheina ei phuah hlâlei cha, Na siesai hra khah y.

¹⁹ Hy Khazohpa, na siana nata na hmo­taotheina ta avâ sâhpazy kaw daih ta, Nâ cha hmo rônahpazy a taotuhpa na châ; Hy Khazohpa, nâ hawhpa he ahy ma a y?

²⁰ Nôpona nata chhiena hluhpi nâ pahmôsatuhpa nâma tlai chata, Na pahro heih aw chi ta, Alei athupa tawhta eina thaoh heih aw chi.

²¹ Ei rônahna papôhsa aw chi ta, Thlah eina palôh heih aw chi.

²² Na ngâchhihna vâta, Hy Khazohpa, Totâ ta cha reithai aw na ta; Hy Izarei Mo Pathaihpa, Tlaipih ta cha reithaipa ta ei sa aw.

²³ Nâma reithaina hla ei sa tita, Ei hmaozy he thaphapa ta awh aw ta; Na chatlaipa ei hro chhao heta, Thaphapa ta a awh aw.

²⁴ Ei paleih he noh y ta na siana bie reih aw ta, Pasasa nâ chhuahpazy cha, Maophyuhpa nata hnabeidypa ta ama y.