HLAZY 68 - Mara Bible RV (BSI)

Chariahpazy pahniena hla

Hla chhituhpa châta: Dâvi Hla

¹ Khazohpa cha thyu aw ta, A chariahpazy papaipa ta y aw ei ta, Ano ahaotuhpazy a hmiakô liata amâ râpai aw.

² Meikhuh phaoh pathlahpa ta a ypa hawhta, Âmo cha papua aw chi ta; Mei liata kheilôh a zaopa hawhta, Moleipazy cha Khazohpa hmia­kô liata ama leidia aw.

³ Mosiapazy deikua cha thaphapa ta, Khazohpa hmiakô liata palôhtlâhpa ta y aw ei ta, A ly ngaitapa ta ama rahao aw.

⁴ Khazohpa lâ hla sa u la, A moh reithai­pa ta sa teh u; Meihdo chô liata a kiahpa châta hla sa u la, A moh cha Abeipa châ ta, A hmiakô liata a lypa ta y teh u!

⁵ Ano cha a pahrâna su pathaihpa liata a ypa Khazohpa châ ta, Paw hnei leipazy châta paw châ ta, Nôhmeizy a duakheituhpa a châ.

⁶ Khazohpa ta matlupa châta chhôhkha taopa ta, Atâhpazy papuapa ta thlao pachhisa ta; Dyuhtuhpazy deikua cha râh raohpa liata ama pahrâ.

⁷ Hy Khazohpa, na phopi hmia lâta sie chi ta, Râhchawhpa liata na sie laih nona kha, Selah

⁸ Khazohpa, Sinai Khazohpa hmiakô liata, Khazohpa, Izarei Khazohpa hmiakô liata, Alo a sih ta, Avâzy ta avâ a za pasuasa.

⁹ Hy Khazohpa, khihti phapa vaw tuah chi ta, Na ryuto a panao hapa na paduapathi heih.

¹⁰ Na sahlaozy cha liata pahrâ ei ta, Hy Khazohpa, na phana ta dyhchhiepazy na pasa ei.

¹¹ Abeipa ta bie pie ta, Cha thâtih a phuahtuhpa chanôzy cha, Ama hluh ngaita dia!

¹² “Beizy nata ama pheisaihzy rawrôh ta a râ ei ta, Amâ râpai khai haw,” ama tah. O hâtuhpa chanôzy ta hraona sôh amâ rai.

¹³ Mietaku sadôzy liata a ypa chanôzy cha, Tâkâ ta pahupa mathlaw a hneipa vachhuh lyu ei ta, A mathlaw pawhmaozy liata ngôh patliepa a ypa hawhta ama châ.

¹⁴ Atotaotheipa ta cha liata beizy a papai nona kha la, Zalmaw tlâh liata dâhaw a tlapa na a lyu.

¹⁵ Hy tlâh rônahpa, Bâsanâ tlâh, Hy tlâh lakizy, Bâsanâ tlâh!

¹⁶ Hy tlâh laki saih u, Khazia Khazohpa ta a pahrâ nawpa ta a khopa tlâh cha, A haopa ta moh ei chi ta, Tlyzaw ta Abeipa pahrâ nawpa tlâh cha, A haopa ta nama moh tly?

¹⁷ Khazohpa talailihzy cha thy hluhpi châ ta, Thy sâh hluhpi a châ; Abeipa cha Sinai liata a ypa hawhna khata, Pathaihna ta ama hry liata a pahrâ.

¹⁸ Hy Zehôvâh Khazohpa, Chô lâ na kia nota, Patupazy cha sei ta a chhi chi ta; Cha liata na pahrâ thei nawpa ta, Chyhsazy tawhta hmopiepazy daopa ta, Dyuhtuhpazy tawhta chhao na daopa kha.

¹⁹ Abeipa cha reithaipa ta y mawh sy, Ano cha noh chareih ta phaohri miah phaokheituhpa châ ta, Khazohpa cha eima pachhana a châ. Selah

²⁰ Eima Khazohpa cha pachhana Khazohpa châ ta, Thina tawhta puana chhao, Abeipa, zibeipa liata a y.

²¹ A chariahpazy deikua cha, Khazohpa ta ama luh chhawh pathlah aw ta, A thaileichâna lâpi a chhihpa hrôtô a chhawh pathlah aw.

²² Abeipa ta hetana heta a tah: “Bâsanâ râh tawhta a chhi heih aw ei na ta, Tilaipi athupa tawhta ei chhi heih aw ei.

²³ Chatanachata ama thisaih liata na phei tly aw chi ta, Na izy paleih ta khakhaipazy liata tovyuh a hnei aw.”

²⁴ Hy Khazohpa, na sie haipa hmô ei ta, Ei Khazohpa, ei Beipa, Su pathaihpa lâ na siepa chhao ama hmô.

²⁵ Hlasathaipazy hmia a sahpa ta, Pyungia tô thaipazy a hnôh chai ta y ei ta, A likawh liata laihsa kôpazy paotlâ tôpa ta sie ei ta,

²⁶ “Khazohpa cha pakhypi rônahpa liata reithai u la, Izarei tihnawh saih u, Abeipa cha reithai teh u,” ama tah.

²⁷ Hawti chaipa Benzami ta âmo cha chhihtha ta, Zudâh chhituhpa hluhpi y ei ta, Zebulawna nata Nâthalai chhituhpazy amâ hlao hra.

²⁸ Hy Khazohpa, na hmotaotheina aw la, Hy Khazohpa, na tao tyhpa hawhta, Na thatlôna miah pahmô heih mah y.

²⁹ Zerusale liata nâma Achhyna o vâta, Beizy ta kuhriazy ama cha vaw cheipa aw.

³⁰ Lohthizy hry liata sahrâhpazy ra la, Phopizy viahchao tôhpa nata viahchaotawzy ra mah y. Râhpaw a tlaichhaipazy cha na phei ry liata tlypâ la, Adyuhna a pahâh kawpa phopizy hiepatla ha mah y.

³¹ Izi râh tawhta lyuhchâpazy a khy aw ei ta, Kusi ta Khazohpa lâ a ku thlai a pazawh aw.

³² Hy khizaw râhzy saih u, Abeipa lâ reithaina hla sa u la, Selah

³³ Avâzy chô a kiahpa lâta, Avâ hlôpazy chô a kiahpa lâ tlai ta, Reithaina hla sa muh vy. Moh teh u, a ao papua ha ta, A ao rônahpa a papua haw.

³⁴ Khazohpa cha hmotaotheina patosa teh u; A rônahna Izarei chô liata y ta, A thatlôna avâ liata a ypa a châ.

³⁵ Hy Khazohpa, na supathaihpa liata chizapa châ chi ta, A phopi hnohta hmotaotheina nata thatlôna a piepa, Izarei Khazohpa na châ. Khazohpa cha reithaipa ta y mawh sy!