HLAZY 67 - Mara Bible RV (BSI)

Khazohpa hmia khaihna hla

Hla chhituhpa châta: Pyungiapa ri chhaopa ta sa awpa. Reithaina Hla.

¹ Khazohpa ta miah ngiachhie sala, Byhnâ miah pie sala, Eima chô liata a hmia pakhaihsa mawh sy. Selah

² Chatanachata na lâpi cha alei chô liata pahnopa ta y aw ta, Na pachhana cha râh to liata pahnopa a châ aw.

³ Hy Khazohpa, phopizy ta cha reithai ei sala, Phopi to ta cha reithai mawh ei sy!

⁴ Râhzy ama thapha sala, Alyna hla sa mawh ei sy; Nâ cha phopizy â khongâhpa ta pachia chi ta, Khizaw râhzy a chhihthatuhpa na châ. Selah

⁵ Hy Khazohpa, phopizy ta cha reithai ei sala, Phopi to ta cha reithai mawh ei sy!

⁶ Alei ta a kôvei papôhsa ta, Khazohpa, eima Khazohpa tlai ta byhnâ miah a pie aw.

⁷ Khazohpa ta byhnâ miah pie aw ta, Khizaw kaokih ta ano cha chi mawh ei sy!