HLAZY 66 - Mara Bible RV (BSI)

Khazohpa hmotao rônahpazy reithaina

Hla chhituhpa châta: Reithaina Hla

¹ Leilô zydua saih u, Khazohpa lâ thaphapa ta awh u la,

² A moh rônahna hla sapa ta, Reithaina rônahpa hlâ teh u.

³ Khazohpa hnohta, “Na hmotaopazy noâh a chhih ta, Na hmotaotheina a rônah kaw dia! Chavâta na chariahpazy a bôhpa ta nâ lâ amâ vy.

⁴ Khizaw zydua nâ lâ a bôhpa ta, Nâ reithaina hla sa ei ta, Na moh reithaipa ta ama sa,” tah muh vy. Selah

⁵ A vy u la, Khazohpa hmotaopazy he moh teh u: Chyhsa sawzy chô liata a hmotaopa he, Noâh â chhih kaw dia!

⁶ Tilaipi cha alei hipa pachâsa ta, Phei ta vahpi ti ama chaka. Cha liata ano liata thaphapa ta eima y;

⁷ A thatlôna ta tlyzaw ta ryureih ta, A mo ta râhzy khâ a vaih tyh. Dyuhtuhpazy âmosasyh a cheihchalo khah ei sy. Selah

⁸ Hy phopizy saih u, eima Khazohpa reithai u la, Ano reithaina pyu cha theipa ta y mawh sy.

⁹ Ano cha eima hrona a pabohsatuhpa châ ta, Eima phei a chapia awpa a pasaih leipa a châ.

¹⁰ Hy Khazohpa, miah pasia chi ta, Tâkâ pasiapa hawhta miah na pasia.

¹¹ Sao lâta miah a chhi chi ta, Eima ky liata phaohri ngaitapa miah na pavi.

¹² Eima luh chô liata chyhsazy pakiasa chi ta, Mei nata ti sie pahlie pi ta, Chatanachôta ativyna su lâ miah nâ chhi papua.

¹³ Raopa hlânazy chhaota na o liata a vaw ngia aw na ta, Ei bietaizy nâ liata ei patlô aw.

¹⁴ Ei hmao ta a vaw rei hapazy patlô aw na ta, Ei nôpo nota ei pakah ta bie â taihpazy ei patlô aw.

¹⁵ Sa thawhpazy ta raopa hlânazy cha hlâ aw na ta, Mietaku tôhpazy ta châ theihpa ta, Viahchao tôhpazy nata miezy ei cha hlâ aw. Selah

¹⁶ Nâmo, Khazohpa a chipa zydua saih u, A vy u la, nathlie teh u; Ei hro châta a hmotaopazy ei cha chho aw ei.

¹⁷ Ei pakah ta ano cha pado na ta, Ei paleih ta ei palyupalih.

¹⁸ Ei palôh liata moleina ei pasô khiahta cha, Abeipa ta na nathlie aw vei.

¹⁹ Châhrasala Khazohpa ta na nathlie hmeiseih ta, Ei thlahchhâna ao a thei haw.

²⁰ Ei thlahchhâna dytha leipa ta, Kyh eina pachâna a tleih beih leipa vâta, Khazohpa cha reithaipa ta y mawh sy!