HLAZY 65 - Mara Bible RV (BSI)

Pachhana Khazohpa reithaina

Hla chhituhpa châta: Dâvi Hla

¹ Hy Khazohpa, Zaio liata reithaina ta cha hâ thlâh ha ta, Bietaizy nâma liata patlôpa a châ aw.

² Hy thlahchhâna a theituhpa y, Chyhsapa zydua nâ lâ amâ vy aw.

³ Moleina ta miah a pahnie tita, Eima paraonazy vâta chatlaina miah na taopa tyh.

⁴ Na dôhpachhôh tlyhmia liata pahrâ awpa ta, A tlyh chi ta, na kiapâh lâ nâ chhipazy cha, Ama nohlao kaw dia! Na o phana vâta lôhrâtlôpa ta y aw pi ta, Nâma Achhyna o pathaihpa vâta lôhrâtlôpa ta eima y aw.

⁵ Hy eima pachhana Khazohpa y, Hmo rônahpa taopa ta siana ta miah a chhy chi ta; Nâ cha khizaw kaokih hnabeiseihna châ chi ta, Tilaipi a hla chaipazy hnabeiseihna chhao na châ.

⁶ Na thatlôna ta tlâhpizy padua chi ta, Na hmotaotheina ta na pa-i.

⁷ Tilaipi a aoh ngâpazy chalihsa chi ta, Ama tichatlaopa a aoh ngâpazy chalihsapa ta, Phopizy atlaokalina na chalihsa haw.

⁸ Chatanachata leilô chhânazy liata a pahrâpazy chhao ta, Ngiana hmonoâhpa na taopazy vâta chipa ta ama y. My khih vaw deih ta, My noh chhina nata zâlâ noh tlana râhzy cha, Thaphapa ta na paawhsa tyh ei.

⁹ Alei he vaw tlypa ta ti bao chi ta, Alei thata na paphasa; Khazohpa chavah cha ti ta bie ta, Na vaw pachhuapanoh chiehpa hawhta, Chyhsazy cha sâh ta na pasa ei.

¹⁰ Leipaliezy ti ta pabie chi ta, A lei byuhpazy paraihpa ta, Vâsua ti ta panaisa chi ta, Chicheizy byhnâ na pie tyh.

¹¹ Kô cha kôvei lakho pakho chi ta, Na talailihzy siena liata a khô pathlah laih.

¹² Râhchawhpa liata sibiepa thata rôh ta, Tlâhthlôhzy cha thaphana ta amâ tobi.

¹³ Sibiepa suzy cha sahroh zaw ta bie ta, Saikaozy sâh ta khu khaipa ta, Hmaohkha ta awh ei ta, Alyna hla ama sa khoh.