HLAZY 64 - Mara Bible RV (BSI)

Moleipazy tawhta abohna thlahchhâna

Hla chhituhpa châta: Dâvi Hla

¹ Hy Khazohpa, ei nôpona ao he vaw thei la, Chariahpa chichhihna tawhta ei hrona he pabohsa mah y.

² Arulâta moleipazy teina tawhta na nyu la, Hmoparaotuhpa zasâh manôhzy tawhta na nyu mah y.

³ Chazy chata zaozi hawhta ama paleih chata ei ta, Châtai hawhta bie khapazy ta ama mopâ.

⁴ Amâ byhna su tawhta chyhsa phapazy ka ei ta, Â pachyh vei nota eikhapi ta ama ka tyh.

⁵ Hmo moleina tao awpa ta a pasyu raihriepa ta, Arulâta khoheih chô awpa kyh zy reih ei ta, “A hmô theipa y aw veih ei,” ama tah tyh.

⁶ Hmo doleipa tao awpa patuapalua ei ta, “Hmo phapa eima patuapalua haw,” ama tah tyh. Chyhsapa palôh nata pachâna he la, A vaw piehpie kaw tlai na!

⁷ Châhrasala Khazohpa ta âmo cha châtai ta ka ta, Eikhapi ta hmahphaopa ta ama y.

⁸ Âmo paleihzy ta âmo cha a lie thlupa ta, Paraopa ta y aw ei ta; A hmôpa maihta ama luh ama chahuah chie aw.

⁹ Chatanachata chyhsa zydua ta chipa ta, Khazohpa raihria phuah aw ei ta, A hmotaopazy ama pachâ aw.

¹⁰ Mosiapazy cha Abeipa liata a ly ei sala, Ano cha a chhai mawh ei sy! Palôh dopa zydua ta ano cha reithai mawh ei sy!