HLAZY 60 - Mara Bible RV (BSI)

Adyuhna châta thlahchhana

Hla chhituhpa châta: Susâ Eduthi ao ta sa awpa. Dâvi ta Arawharai mo nata Arazôbâ mozy a dyuh ta, Zôabâ ta â vaw liena lâta Alôh Saikao liata Edômâ mo 12,000 a thie nota a phipa, Dâvi Mikatâ Hla. Pachu awpa.

¹ Hy Khazohpa, miah thy ha chi ta, Miah na papyu haw; Na hie cha pahâh ha pi ta, Miah paduapathi heih mah y.

² Râh he pasihsa chi ta, Na hriechheih khai ha hih; A chalyu ngâ kaw ta, A pyunazy taopathi mah y.

³ Na phopi he hmo rupazy pahmôsa chi ta, Kresawhti miah pado chi ta, Paochheichhâpa ta miah na tao haw.

⁴ Nâma châ chituhpazy châta pohraipa parai chi ta, Libaw tawhta amâ râ nawpa na taopa ei. Selah

⁵ Chatanachata na kyhpachâpazy cha pabohsapa ta eima y aw; Na ku chachâh lâta miah pachha la, Miah a chhy mah y!

⁶ Khazohpa ta a su pathaihpa tawhta hetana heta a tah: “Thaphapa ta Sekhe khihpi pachhaih aw na ta, Sukô Saikao ei rairuah aw.

⁷ Kilia cha kei eih châ ta, Manase chhao kei eih a châ; Epharai cha ei lakhu châ ta, Zudâh cha ei ryureina chôchahrei a châ.

⁸ Môabâ cha ei ku asina rahô châ ta, Edômâ cha ei pheiky sona a châ; Philistia chô liata pahniena hladyuh ei pathluah.”

⁹ Ahy ma thokhy khihpi lâ nâ chhi aw? Ahy ma Edômâ lâ nâ chhihtha aw?

¹⁰ Hy Khazohpa, miah dytha ha va chi ma? Hy Khazohpa, eima pheisaihzy hnohta na sie khao vei he zaw.

¹¹ Khakhaipazy a dyuh awpa ta miah bao mah y, Chyhsapa pachhana cha hraoleipa a châ.

¹² Khazohpa chhaota riahphapa ta a dyuh aw pi ta, Ano tlai ta eima chariahpazy a tlypâ aw.