HLAZY 6 - Mara Bible RV (BSI)

Pachhana châta thlahchhâna

Hla chhituhpa châta: Pyungiapa ri chhaopa nata patlapa ta, Semini ao ta sa awpa. Dâvi Hla

¹ Hy Abeipa, na hiehâhpa ta na ra leipa la, Na pathi iapa ta na chhorei khah y.

² Hy Abeipa, zawh nâ ngiah ma y, Ei panao ha hih; Hy Abeipa, na patlâh mah y, Ei ruzy a pasa ngaita.

³ Ei hro nôpo ngaita ta, Hy Abeipa, khati taih a châ aw tly?

⁴ Hy Abeipa, a vaw heih la, Ei hro he pachha mah y; Na zawngiahna hluh ngaitapa vâta, Rie na pachha mah y.

⁵ Thina liata nâma atheina y leipa aw ta, Athihkhih liata ahy ma châ reithai aw?

⁶ Ei hrôna ta ei thachhâ ta, Zâ chareih ei rakhô liata mothlih tipaua tlô ta, Ei khôpheih chana mothlih ta ei padâ khai ha tyh.

⁷ Ei mo he pachârôhna vâta rao khai ha ta, Nâ dyuhtuhpazy vâta a zoh via rili.

⁸ Nâmo moleina hmo a taotuhpa zydua saih u, Na siesai teh u, Abeipa ta ei chana ao thei ha tlôh ta.

⁹ Abeipa ta ei hiana thei ha ta, Abeipa ta ei thlahchhâna â pyh haw.

¹⁰ Ei chariahpa zydua nozapa ta y aw ei ta, Thata ama pachâ a rôh aw; Kua aw ei ta, Thlai ta ama maophyuh aw.