HLAZY 59 - Mara Bible RV (BSI)

Abohna châta thlahchhâna

Hla chhituhpa châta: “Pahleipadia Khah Y” tahpa ao ta sa awpa. Sawla ta chyhsa tuah ta, Dâvi thie awpa ta a o liata amâ byh nota a phipa, Dâvi Mikatâ Hla

¹ Hy ei Khazohpa, ei chariahpazy tawhta na pachha la, Nâ thyuhnaopazy tawhta na vaih mah y.

² Moleina hmo a taotuhpazy tawhta na pabohsa la, Thisaih a palopa chyhsazy tawhta na pachha mah y.

³ Hy Abeipa, moh tua, Ei hrona a byh ei ta, Thatlôpazy ta eina tei ei. Ei paraona vâta châ leipa ta, Ei moleina vâta châ hra vei.

⁴ Ei taopasi leipa chhao ta, Na tei awpa ta a râ ei ta, Amâ kei chhuanoh. A hra la, na bao awpa ta a vy la, moh tua.

⁵ Hy Zehôvâh Khazohpa Atotaotheipa, Nâ cha Izarei Khazohpa châ chi ta, Râhzy hrie awpa ta thyu la, Moleina rarôh ypa taotuhpazy cha, Ahy hmah pahlôh khah y. Selah

⁶ Zâlâ maihta a vaw lie ei ta, Izy hawhta ngapa ta, Khihpi ama chahlô tyh.

⁷ Moh teh u, ama pakah ta pa-ua ei ta, Ama hmaozy liata zaozi y ta, “Ahy miah a thei aw?” ama tah tyh.

⁸ Nâ deikua cha, Hy Abeipa, Âmo pahneisao chi ta, Râhzy mohnaochhihpa ta na tao.

⁹ Hy ei thatlôna, Ei cha mokhâh aw; Hy Khazohpa, Ei thokhy na châ.

¹⁰ A kyhpachâna tleih beih leipa Khazohpa ta na vaw dy aw ta, Ei chariahpazy pahniepa ta ama ypa eina pamosa aw.

¹¹ Âmo cha thie hlei khah y, Chataleipatala ei phopi ta a my pathlei aw na; Hy Abeipa, eima vyhphao, Na hmotaotheina ta âmo cha paviavisa la, Panawh hri mah y!

¹² Ama pakah moleinazy vâta, Ama hmao biezy vâta, Amâ palaina lia tlai ta a ao mawh ei sy. Chhiesana bie nata haipa bie ama reipazy vâta,

¹³ Âmo cha na pathiiana ta kâsao khai sala, Khazohpa cha Zakaw pathlazy chô liata ryureih ta, Khizaw kaokih taihta ryu a reih tahpa pahno mawh ei sy. Selah

¹⁴ Zâlâ maihta a vaw lie ei ta, Izy hawhta ngapa ta, Khihpi ama chahlô tyh.

¹⁵ Nie awpa tluapa ta a khiekhâ ei ta, Ama rih a bie vei khiahta cha ama pahnua tyh.

¹⁶ Kei deikua cha na thatlôna hla sa aw na ta, Na kyhpachâna tleih beih leipa kyh Mydi ta a paropa ta ei sa tyh aw. Nâ cha ei thokhy châ chi ta, Ei nôpona noh ta ei chhaipa na châ.

¹⁷ Hy ei thatlôna, Nâma reithaina hla ei sa aw; Hy Khazohpa, nâ cha ei thokhy châ chi ta, Ei chô liata zawngiahna a palâsatuhpa Khazoh na châ.