HLAZY 56 - Mara Bible RV (BSI)

Khazohpa ngâna

Hla chhituhpa châta: Terebi Vachhuh ao ta sa awpa. Philistinâ mo ta Kâthâ liata ama patu nota Dâvi ta a phipa Dâvi Mikatâ

¹ Hy Khazohpa, na ngiachhie mah y; Chyhsa ta na tlypâ ta, Nâ dyuhtuhpa ta noh y ta eina tlybai.

² Ei chariahpazy ta noh y ta na tlypâ ei ta, Chyhsa hluhpi ta a khotlâh kawpa ta einâ dyuh ei.

³ Ei china maihta, Nâma liata a pahnieh na ta;

⁴ Khazohpa cha a bie vâta reithai na ta, Khazohpa cha ngâ na ta, Chi aw va na. Chyhsapa ta kheihta eina tah thei aw?

⁵ Noh y ta ei biezy pachiahpaliahsa ei ta, Ama pachâna zydua cha ei chhie nawpa sai a châ.

⁶ Na teiparupa ta nâ byh ei ta, Ei sievawnazy ngia ei ta thie einâ chhuah ei.

⁷ Ama moleina vâta âmo cha hrie la, Hy Khazohpa, phopizy cha pathi iapa ta panawhsa mah y!

⁸ Ei viavinazy ngiapa ta, Ei mothlihzy na chhiehraôh liata ryh chi ta, Na châbu liata ropa a châ.

⁹ Ei cha padona noh liata, Ei chariahpazy hnôh a sy aw ei ta, Khazohpa cha ei chhâh a châ tahpa ei pahno aw.

¹⁰ Khazohpa cha a bie vâta reithai na ta, Abeipa cha a bie vâta reithai na ta,

¹¹ Khazohpa cha ngâ na ta, Chi aw va na. Chyhsapa ta kheihta eina tao thei aw?

¹² Hy Khazohpa, bie ei châ taihpazy patlô aw na ta, Alyna biereina hmohlâpa ei cha pie aw.

¹³ Khazohpa hmiakô liata chareipa ta, Hrona khaihpa liata charei awpa ta, Ei hrona he thina tawhta pachha chi ta, Ei pheizy he ahluana tawhta na pabohsa haw.