HLAZY 55 - Mara Bible RV (BSI)

Abeipa liata phaohri pachhôna

Hla chhituhpa châta: Pyungiapa ri chhaopa ta sa awpa. Dâvi Maskili

¹ Hy Khazohpa, ei thlahchhâna lâ na nah pachôh la, Ei châ hawna he a nyusai khah y!

² Na nathlie la, nâ chhy mah y; Ei palôh a tymâ ta ei pachâ a rôh ngaita,

³ Chariahpa pyu thei na ta, Moleipa ta eina moaipa vâta. Chhiena na thy thlu ei ta, Hiehâhpa ta eina taochhie ei.

⁴ Ei chhôhso palôh pasa ngaita ta, Thina chichhihpazy ta eina vi.

⁵ China nata achalyuna ta na patu ta, Thlazohna ta eina chanaoh.

⁶ “Aw, vachhuh hawhta mathlaw hnei aw sah la, A zaw aw na ta, ei pahâ ha awpa tlai!

⁷ A châ na, lâhlapi lâ a zaw syulyu ha aw na ta, Râhchawhpa liata ei y ha awpa tlai! Selah

⁸ Abohna su lâ a râ para aw na ta, Thlihpipa nata thlihrâhpa tawhta ei boh ha awpa tlai!” tah na ta.

⁹ Hy Abeipa, khihpi liata atudaina nata ahryuna zy hmô na ta; Âmo cha pahleipadia la, Ama paleih hriechheih khai ha mah y.

¹⁰ Chhô nah zâ ta khihpi cha a thokhy chô liata chahlô ei ta, Khihpi chhôh cha moleina nata tymâna ta a bie.

¹¹ Khihpi chhôh cha paraona ta bie ta, Tlybaina nata dôveina zy ta a lâlaizy puasai beih vei.

¹² Nâ reipachhietuhpa cha chariahpa a châ khiahta cha, Maoh oh thei thlâh ha aw na ta; Nâ palai thlupa cha khakhaipa a châ khiahta cha, Ei nyusai thei thlâh ha aw.

¹³ Châhrasala nâ, ei chiheihpa chyhsa, Ei kaolâhpa nata ei viasa phapa cheingei ta, Cha hawhta eina tao chi.

¹⁴ Nâ nata kei cha reikah thlôhpa ta bie reih khoh tyh pi ta, Khazohpa o liata a kao tyhpa mah eima châ tâh.

¹⁵ Ei chariahpazy chô liata thina vaw tlô sala, Ama hrohpa ta Athihkhih lâ sie mawh ei sy; Ama pahrâna su liata hmo pha leipa y ta, Ama palôh hmo pha leipa ta a bie.

¹⁶ Kei deikua cha Khazohpa pado aw na ta, Abeipa ta eina pachha aw.

¹⁷ Zâlâ ta zy, my ta zy, nohchhô ta zy, Ei nôpona bie reipa ta a rôh na ta, Abeipa ta ei ao eina thei.

¹⁸ Nâ dyuhpa hluh ngaita hra ei sala, Ei hro he chatlaipa ta abohna su liata paysa ta, Chariah ei dyuhpa tawhta eina pachha haw.

¹⁹ Âmo cha hro a thla awpa khoh leipa ei ta, Khazohpa ama chi leipa vâta, Beidyuchhai liata tlyzaw ta a tyuhpa Khazohpa ta, Ei hiana thei aw ta âmo cha a panawh aw. Selah

²⁰ Ei kaolâhpa ta a viasazy a dyuh ta, A biehrai a parao haw.

²¹ A pakah cha sâhpiti kuapa hawhta pahnia ta, A palôh lia deikua adyuhna ta a bie. A biezy sathaw hlâta nai via ta, Châhrasala zaozi phia hapa a châ.

²² Na phaohri Abeipa liata pachhô la, Ano ta tha a cha patlô aw; Mosiapa cha pao pasaih beih aw vei.

²³ Châhrasala Hy Khazohpa, Moleipazy cha leidiana khaohtlô liata pathla aw chi ta, Thisaih a palopa nata chyhsa a dôveipazy cha, Ama chhâ khophie chhao hroh aw veih ei. Kei deikua cha, nâ ei cha ngâ aw.