HLAZY 52 - Mara Bible RV (BSI)

Kyhpachâna tleih beih leipa

Hla chhituhpa châta: Dâvi Maskili: Edômâ chyhsa Dôe ta Sawla hnohta, “Ahimele o lâ Dâvi â vy,” tahpa a chho nota a phipa hla

¹ Hy chyhsa thatlôpa, khazia hmo pha leipa nâ palaikhei tly? Khazohpa phana cha noh y ta y tlôh ta.

² Nâ, dôveina rai a hriatuhpa, Na paleih ta raona patohpatia ta, Na paleih cha chaidâh tiahpa hawhta a châ.

³ Phana hlâta chhiena pasô via chi ta, Biedopa reipa hlâta haipa bie reipa na pasô via. Selah

⁴ Hy nâ, dôvei a thaipa paleih, Chyhsa a palâ khaipa bie to na pasô rimâ cha!

⁵ Khazohpa ta tlyzaw ta cha parao aw ta, Na poh o tawhta châ daophipa ta cha hriechheih aw ta, Ahrohpa râh tawhta a cha phia pathlah aw. Selah

⁶ Cha cha mosiapazy ta hmôpa ta chi aw ei ta, Ano cha pahneisao aw ei ta,

⁷ “Moh tua u, he chyhsa he, Khazohpa cha â chhaina ta tao leipa ta, A hneirôna liata a pahnieh ta, A moleina liata tha â patlôpa chyhsa a châ hih,” ama tah aw.

⁸ Kei deikua cha Khazohpa o liata, Ôli tho hrohpa hawhta châ na ta, Khazohpa kyhpachâna tleih beih leipa cha, Chhâzaw nata tlyzaw ta ei ngâ aw.

⁹ Cha hmo cha na taopa vâta, Chhâzaw ta alyna bie cha hlâ aw na ta; Na mopathaihpazy mohmô liata, Na moh ei hâ hualua aw; Cha cha hmo phapa châ tlôh ta.