HLAZY 50 - Mara Bible RV (BSI)

Pachiatuh Khazohpa

Asâpha Hla

¹ Abeipa, Khazohpa Atotaotheipa ta bie reih ta, Noh chhina tawhta noh tlana taihta, Leilô zydua a awpakhy.

² Khazohpa cha Zaio tawhta vaw khaih ta, Khihpi ngia chaipa tawhta a vaw khaih.

³ Eima Khazohpa a vy ta, A thlih thlâh ha vei; A hmiakô liata mei thata kâ ta, A chheipâh liata thlihpi thata a pathli.

⁴ A phopi pachia awpa ta, Chô lâ avâzy aw ta, Alei chhao a aw.

⁵ “Atheihna ta ei hnohta biehrai a taopa, Ei mopathaihpa zy kha, Kei lâta awpakhy teh u,” Abeipa ta a tah.

⁶ Avâzy ta a siana phuah ta, Khazohpa ano tlai cha pachiatuhpa a châ. Selah

⁷ “Hy ei phopi, nathlie teh, Bie ei reih aw; Hy Izarei, ei cha chakhia aw, Kei he Khazohpa châ na ta, Na Khazohpa cha ei châ.

⁸ Atheihna na hlâpazy vâta cha ra leipa na ta, Raopa hlânazy ei hmiakô liata khâ na hlâ tyhpa vâta cha ra hra va na.

⁹ Na o tawhta viahchao tôhpa la leipa aw na ta, Na sahroh o tawhta miezy la hra aw va na.

¹⁰ Râhmâhpa liata râhsa zydua kei eih châ ta, Tlâhpi sâh kha liata sa zydua chhao kei eih a châ.

¹¹ Tlâhpizy liata pavaw zydua pahno khai na ta, Lyurâhpa liata hmohrohneipa zydua kei eih a châ.

¹² “Ei no a dipa chhao ta, Nâ la cha chho hlei aw va na; Khizaw nata a chhôh liata a ypa zydua he, Kei eih sai a châ.

¹³ Viahchao tôhpa sa niepa ta, Mie thisaih ei doh beih ma?

¹⁴ Khazohpa lâta alyna biereina atheihna hlâ la, Chônôchaipa hnohta na bietaizy patlô mah y.

¹⁵ Nôpona noh liata na pado la, Cha pachha aw na ta, Chatanachata eina parôhnasa aw chi,” Abeipa ta a tah.

¹⁶ Moleipa hnohta deikua cha, Kha­zopa ta hetana heta a tah: “Ei bieraopa bievaopa ta reih ta, Ei biehrai na hmaozy ta reih awpa ta, Khâpa biehneina ma na hnei tly?

¹⁷ Pachuna a haopa ta, Ei biezy hnôhchhy tlôh chi ta.

¹⁸ Aparupa na hmô nahta, A chô liata a ly chi ta, Apheipazy nâ kao tyh.

¹⁹ “Na pakah moleina lâ pie chi ta, Na paleih ta dôveina bie a tao tyh.

²⁰ A tyuh chi ta, na unawhpa reipasipasua chi ta, Na nô sawchapawpa cheingei na reipachhie.

²¹ Cha hmozy cha tao chi ta, Châhrasala a chalih thlâh ha na ta, Nâma hawhpa khiah ma ei châ eina tah chi. Châhrasala tahmâ cha, cha ra aw na ta, Hmiadaisâ ta ei cha leih bâ aw.

²² “Chavâta nâmo, Khazohpa a mypa saih u, A phapa ta pachâ teh u; Chataleipatala cha hriechheih aw ei na ta, Châ pachha awpa y aw veih ei.

²³ Alyna bierei atheihna hlâtuhpa ta na parônahsa ta, A yzie â dopa ta a vaotuhpa hnohta, Khazohpa pachhana ei pahmô aw.”