HLAZY 5 - Mara Bible RV (BSI)

Mydi thlahchhâna

Hla chhituhpa châta: Ramozy nata patla awpa. Dâvi Hla.

¹ Hy Abeipa, ei bie nathlie la, Ei hrôna kyh he pachâ mah y.

² Ei Beipa nata ei Khazohpa, Ei awna ao he nathlie mah y, Nâma lâ thlah a chhâpa ei châ hih.

³ Hy Abeipa, my ta ei ao thei mah y, My ta nâma lâ thlahchhâ na ta, ei cha hâ.

⁴ Nâ cha paraona liata a lypa Khazohpa na châ leipa vâta, Moleipa cha na hnohta pahrâ thei aw vei.

⁵ Apalaipazy cha na mohmô liata a duah thei aw veih ei, Hmo moleipa a taopa zydua a hao tlôh chi ta.

⁶ Haipa bie a reihpazy pahleipadia chi ta, Thisaih palo hmâhpa nata dôvei thaipazy cha, Abeipa ta â hao ei.

⁷ Kei deikua cha na zawngiahna hluh ngaitapa vâta, Na o liata a ngia thei aw na ta; Nâma china chôta, Na Achhyna o pathaihpa lâ a heipa ta ei bôh aw.

⁸ Hy Abeipa, ei chariahpazy vâta na siana liata nâ chhi la, Ei hmiakô liata na lâpi patlâsa mah y.

⁹ Ama pakah liata ngâchhihna y leipa ta, Ama palôh cha paraona ta a bie. Ama rao cha thlâ a pahypa châ ta, Ama paleih ta hmiahmô ama châ tyh.

¹⁰ Hy Khazohpa, âmo cha thaileichâpa ta phuah la, Ama ryhraona tlai ta pao ei sala, Ama moleina hluhpi vâta âmo cha thy ha mah y, Nâma châ dyuhpa ama châ hih.

¹¹ Nâma châ chhaipa zydua deikua a ly ei sala, Alyna hla khâ sa mawh ei sy; Na vaina poh ta âmo cha khu la, Na moh a pasôpazy nâ liata a ly mawh ei sy.

¹² Hy Abeipa, nâ cha mosiapazy byhnâ a pietuhpa châ chi ta, Na khokheina ta vyhphao hawhta âmo na dôhkhâh tyh.