HLAZY 48 - Mara Bible RV (BSI)

Khazohpa khihpi Zaio rônahna

Kôrâ Sawchapawzy Hla

¹ Abeipa cha rônah ta, Eima Khazohpa khihpi tlâh pathaihpa liata, Rônah ngaitapa ta reithai awpa a châ.

² A tlâh sâhzie angiana ta, Khizaw zydua palysa ta, Maw lâta Zaio Tlâh cha, Bei rônahpa khihpi a châ.

³ Khazohpa cha thokhy ta dôhpa abei ozy liata pahrâ ta, Ano tlai cha abohna thokhy a châzie a palâsa.

⁴ Moh teh u, beizy a awpakhy ei ta, Hmaohkha ta ama vaw sie.

⁵ Thokhy khihpi ama hmô nahta thata a pahlaw ei ta, Thlazohpa ta amâ râpai.

⁶ Achalyuna ta âmo cha patu ta, Chanô sawzeih pasa ta ama pasa.

⁷ Nochhi thlih hmâpa ta, Tâsi balyhzy na parao haw.

⁸ Eima theipa hawh tlai ta, Pheisaihzy Abeipa khihpi liata hmô pi ta, Eima Khazohpa khihpi liata eima hmô; Khihpi cha Khazohpa ta chhâzaw ta a pabohsa aw. Selah

⁹ Hy Khazohpa y, nâma Achhyna o chhôh liata Na kyhpachâna tleih beih leipa eima pachâ tyh.

¹⁰ Hy Khazohpa, na moh hawh tlai ta, Na reithaina khizaw kaokih taihta tlô ta, Na ku chachâh lâ cha siana ta a bie.

¹¹ Na ryureina dopazy vâta, Zaio Tlâh a ly sala, Zudâh sawchanôzy thaphapa ta y mawh ei sy!

¹² Zaio chahlôpa ta padô u la, A riahvaina osâhpazy reih teh u.

¹³ Chhâ a vaw y awpazy chho awpa ta, Khôtho lâ tawhta thokhy pathopazy pachâ u la, Abei o thokhyzy chahryh teh u.

¹⁴ Ano cha Khazohpa cha châ ta, Chhâzaw nata tlyzaw ta eima Khazohpa a châ; Thina khô lâ taihta miah a chhihtha aw.