Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

HLAZY 45 - Mara Bible RV (BSI)


Abei lapinô pakiana hla
Hla chhituhpa châta: Lilipaw ao ta sa awpa. Kôrâ sawchapapawpazy Maskili. Vâia hla.

1 Ei palôh he bie thlôhpa ta khô pathlah ta, He hla châhzy ta abei cha hla phi na ta, Ei paleih he chârohtuhpa phapa châsôh hawhta a châ.

2 Chyhsa sawzy hlâta chhithai chai chi ta, Na hmaozy liata ngiachhiena hrypa châ ta, Chavâta Khazohpa ta chhâzaw ta vânoh a cha patosa.

3 Hy pasaipha, na zaozi na chai liata a saih la, Rônahna nata abeina ta a tobi mah y.

4 Biehmeiseihpa nata areisina nata siana châta, Nâ beina ta pahniena arâ kiah la, Na ku chachâh lâta hmo rarôh ypazy cha pachu mawh sy!

5 Na châtai tiahpazy ta abei chariahzy palôh chhôpahlie sala, Phopizy na ry liata pao mawh ei sy.

6 Hy Khazohpa, na beidyuchhai cha, Chhâzaw nata tlyzaw ta y ta; Nâ beinarâh chôchahrei cha, Adona chôchahrei a châ.

7 Siana pasô chi ta, Moleina nâ hao; Chavâta Khazohpa, na Khazohpa ta, Na viasazy hlâta rônah viapa ta, Thaphana sathaw a cha thu.

8 Na chysiazy cha ropahâhpa ta biepa ta, Deiryh, lilipaw nata lôiasoh rohzy ta bie ta, Sianaoh abei ozy tawhta Pyungiapa chhaichhi ri chhaopazy ta a cha palysa tyh.

9 Chanô zachhihpazy hry liata, Abei sawchanôzy a hlao hra ei ta; Na chachâh lâta beinô a duah ta, Ôphi ngôh ta â tobi.

10 Hy ei sawchanô, nathlie la, Pachâ la, na nah pachôh la, Na phopi nata na paw o my ha mah y!

11 Na chhithaina ta abei hia patliasa aw ta, Ano cha na zibeipa châ tlôh ta, A hmiakô liata a bôh tyh mah y.

12 Tyre zuah ta kuhria chabapa ta na khokheina tlua aw ta, Chyhsa hneirôh chaipazy taihta na khokheina ama tlua aw.

13 Ngôh kiky zeipa chysiazy ta a tobi ta, A chhôhpadâhpa liata a ypa, Abei sawchanô cha a rônah kaw dia!

14 Kiky zeipa pohzy a bupa ta, Abei lâ a chhipa châ ta, A viasa laihsa kôpazy ta ano cha ama pazi.

15 Alypa nata thaphapa ta a chhi ei ta, Abei o chhôh lâ amâ ngia.

16 Châ pathlatuhpazy su liata na sawchapawzy a duah aw ei ta, Âmo cha alei chô zydua liata beizy ta na tao aw ei.

17 Chhâ zydua ta na moh a thei thlâh ha awpa ta cha tao aw na ta, Chavâta râhzy ta chhâzaw nata tlyzaw ta ama cha reithai aw.

The Bible Society of India

© 2023, Used by permission. All rights reserved.

Bible Society of India
ကြှနျုပျတို့နောကျလိုကျပါ:



ကြော်ငြာတွေ