Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

HLAZY 4 - Mara Bible RV (BSI)


Zâlâ thlahchhâna
Hla chhituhpa châta: Pyungiapa chhaichhi ri chhaopa nata patla awpa. Dâvi Hla

1 Hy ei siana Khazohpa y, Ei cha aw tita nâ chhy mah y! Ei nôpo nota huhiehna nâ pie tyhpa châ chi ta, Na ngiachhie la, ei thlahchhâna he rie thei mah y.

2 Hy chyhsazy saih u, Khati taih ma ei zachhihna he nozana ta tao aw ei chi ta, Khachâ ma hraoleipa biezy tlaichhaipa ta, Haipa biezy nama tlua aw tly? Selah

3 Khazohpa a pachâpazy cha, Abeipa ta ano châta a panano tyh tahpa pahno u la, Ei awna maihta, Abeipa ta eina nathlie tyh tahpa pahno muh vy.

4 Nama hiehâh sala, Molei deikua molei khuh vy; Nama rakhô chô liata nama palôh ta pachâ u la, A chalihsai thlâh ha muh vy. Selah

5 Atheihna dopazy hlâ u la, Abeipa liata nama ngâna pahnieh muh vy.

6 Chyhsa hluhpi ta, “Ahy ma hmo phapa miah a pahmô aw? Hy Abeipa, na hmia khaihpa eima chô liata pakhaih mah y!” tah ei ta.

7 Âmo alyna hlâta alyna hluh via ei palôh liata soh chi ta, Sâh nata kresawhti hluhpi ama hnei nota amâ lypa hlâta Ei ly via syulyu.

8 Thlalôhpa ta a zia aw na ta, Ei mô aw; Hy Abeipa, nâ deita he Abohpa ta nâ paysatuhpa cha na châ.

The Bible Society of India

© 2023, Used by permission. All rights reserved.

Bible Society of India
ကြှနျုပျတို့နောကျလိုကျပါ:



ကြော်ငြာတွေ