HLAZY 35 - Mara Bible RV (BSI)

Khakhaipa tawhta abohna thlahchhana

Dâvi Hla

¹ Hy Abeipa, nâ chakhiatuhpazy chakhia la, Nâ dyuhtuhpazy a dyuh mah y!

² Vyhphao laipa nata vyhphao chyhpazy a chaba la, Na bao awpa ta thyu mah y!

³ Asei nata seichhi zy phia la, Nâ chadaituhpazy pakhâ mah y! Ei hrona hnohta, “Na pachhana ei châ,” tah mah y!

⁴ Ei hrona pahlei a chhuahpazy cha, Nozapa nata maophyuhpa ta y ei sala; Ei chô liata chhiena tao a chhuahpazy chhao, Kua ei sala hnabeidypa ta y mawh ei sy!

⁵ Thlih ta sâh sihpa a phaopa hawhta châ ei sala, Abeipa vâlyuhchâpa ta âmo cha papua mawh sy!

⁶ Ama lâpi zohpa ta pahnia sala, Abeipa vâlyuhchâpa ta âmo cha a chadai mawh sy!

⁷ A chhâpa y leipa ta ama sao na chôkhâh ei ta, A chhâpa y leipa ta ei hrona he khaohtlô ama chao khâh.

⁸ Â pachyh vei nota raona ta vaw tlô thlupa ta, A sao chôpa liata anosasyh a ao sala, Cha liata tlasao mawh sy!

⁹ Chatawhcha Abeipa liata ei hro a ly aw ta, A pachhana liata a tha a pha aw.

¹⁰ Ei rupa zydua ta, “Hy Abeipa, nâ hawhpa he ahy ma a y?” tah ei ta, “Thatlôpa tawhta dyhchhiepa a pachhatuhpa, Âmo a hraotuhpa tawhta dyhchhiepa nata phahlapa a pachhatuhpa cha, Ahy ma a y tly?” ama tah aw.

¹¹ Pahnokheituhpa pakheipazy thyu ei ta, Ei pahno beih leipa hmozy eina hiahri ei.

¹² Phana cha chhiena ta na thô ei ta, Ei hro rie a thei ngaita.

¹³ Âmo ama pasa tita deikua cha, Latho poh a bu na ta; Kâhvileipa ta pasataopa ta, Ei luh a khupa ta thlah ei chhâ tyh.

¹⁴ Ei viasa nata ei unawh zy ei taokheipa hawh ei ta, Âmo cha taokhei laih ei na ta, A nô châta chaphôh a tupa hawhta, A bôh na ta mâchhie ei sapa tyh ei.

¹⁵ Âmo deikua cha ei chapiana liata, Thaphapa ta a hmaohpakhy ei ta; Keima tei awpa ta ei pahno leipa ta a hmaohpakhy ei ta, Bâh leipa ta eina taochhie ei.

¹⁶ Kyhchhi nota chyhsa a pachhie tyhpazy hawhta, Ama hâhzy eina charieh chie ei.

¹⁷ Hy Abeipa, khati taih ma na mo thlâh ha aw tly? Ei thlahpa he ama paraona tawhta pachha la, Ei hrona sôhpa he chakeibarôhneipazy tawh­ta pachha mah y!

¹⁸ Pakhypi rônahpa liata alyna bie cha hlâ aw na ta, Chyhsa hluhpi hry liata ei cha reithai aw.

¹⁹ A chhâpa y leipa ta nâ khakhaipazy cha, Ei chô liata hmo a tlôpa vâta amâ ly awpa pasaih leipa la; A chhâpa y leipa ta nâ haotuhpazy chhao, Eina mopasih awpa ei pasaih khah y.

²⁰ Adyhna bie reih leipa ei ta, Râh liata a y molo thlâh hapazy lâ a heih ei ta, Âmo dôvei nawpa biezy tlao ama pachâ tyh.

²¹ Ama pakah na â chie ei ta, “Khawh, khawh, eima mo ta a hmô haw,” ama tah tyh.

²² Hy Abeipa, hmô ha chi ta, A chalih khah y! Hy Abeipa, rie nâ hla khah y!

²³ Ei Khazohpa nata ei Beipa, Ei bie a duakhei ta thai na pachâsa awpa ta, A hra la, thyu mah y!

²⁴ Hy Abeipa, ei Khazohpa, Na sianazie lymâ hawhta thai na pachâsa la, Ei chhiena liata amâ ly awpa pasaih khah y!

²⁵ Ama palôh liata, “Khawh, eima khopa eima hmô ha hih!” Ama tah awpa pasaih leipa la; “Eima palâ khai haw,” Ama tah awpa chhao pasaih khah y.

²⁶ Ei chhiena liata a lytuhpazy cha, Maophyuhpa nata hnabeidypa ta y ei sala, Nâ palai thlupazy cha, Hmiachhiena nata nohzaona ta tobipa châ mawh ei sy!

²⁷ Ei thaichâna nâ lykheituhpazy cha, Thaphapa ta awh ei sala, “Abeipa cha rônah ta, Ano a chakaotuhpazy hlaotlohna ama to tita, A ly kaw tyhpa a châ,” tahpa ta, Thaphapa ta khâ awh mawh ei sy.

²⁸ Chatanachata ei paleih ta na siana bie chho aw ta, Noh y ta ei cha reithai aw.