HLAZY 30 - Mara Bible RV (BSI)

My nohchhi liata alyna

Dâvi Hla. Achhyna o hlâna

¹ Hy Abeipa, na chaluah chi ta, Ei khakhaipazy alyna ta eina tao leipa vâ chi ta, Ei cha palyupalih.

² Hy Abeipa ei Khazohpa, Baona hiapa ta cha awsao na ta, Eina patlâh ha chi.

³ Hy Abeipa, Athihkhih tawhta ei thlahpa thaoh papua chi ta, Khaohtlô lâ a zupazy tawhta ei hrona na pahro heih.

⁴ Hy a mopathaihpazy saih u, Abeipa reithaipa ta sa u la; A moh pathaihpa lâ alyna bie hlâ teh u.

⁵ A hiehâhna cha buakha châ deita châ ta, A khokheina deikua cha hro chhôh châta a châ. Zâ chhôh ta chana y hra sala, My ta alyna a vaw tlô tyh.

⁶ Kei deikua cha vânoh topa ta ei y nota, “A chalyu beih aw va na,” ei tah tyh.

⁷ Hy Abeipa, na khokheina vâta, Ei tlâhpi cha thatlôpa ta paduasa chi ta; Na hmia na nyu ha tita deikua cha, Pachârôhpa ta ei y tyh.

⁸ Hy Zehôvâh, cha awsao na ta, Hy Abeipa, zawh nâ ngiah awpa ta ei châ haw.

⁹ Khaohtlô lâ zu hraw sah la, Ei thina liata khâpa athôhna a y aw? Dohlei ta cha reithaipa ta, Na ngâchhihna bie a chho aw ma?

¹⁰ Hy Abeipa, na thei la, zawh nâ ngiah la, Hy Abeipa, nâ baotuhpa châ mah y!

¹¹ Ei mâchhiesana cha lâna lâta pachâsapa ta, Ei latho poh na pahluhpa chi ta, Thaphana ta ei chai eina saih ha chi.

¹² Ei hrona tlokhuh ta na reithaina hla sa aw na ta, A chalih aw va na; Hy Abeipa ei Khazohpa, Tlyzaw ta alyna bie ei cha hlâ aw.