HLAZY 29 - Mara Bible RV (BSI)Abeipa rônahna Dâvi Hla 1 Hy vâmozy saih u, Abeipa palyupalih u la; Abeipa cha rônahna nata thatlôna patosa muh vy. 2 Abeipa cha a moh rônahna patosa u la, Abeipa cha pathaihna nata angiana ta a chhy muh vy. 3 Abeipa ao cha tizy chô liata y ta, Khazoh rônahpa cha a thua ngâ ta, Abeipa cha ti hluhpi chô liata a ypa a châ. 4 Abeipa ao cha hmotaothei ta, Abeipa ao cha rônahna ta a bie. 5 Abeipa ao ta sidy thozy thlie ta, Abeipa cha Lebanaw sidy thozy a thliepa a châ. 6 Lebanaw cha viahchaotaw châkizohpa hawhta paysa ta, Siriô chhao chaoliahtaw hawhta a paysa. 7 Abeipa ao ta mei paleihzy papua ta; 8 Abeipa ao cha râhchawhpa chalyusapa ta, Abeipa cha Kâdesâ râhchawhpa chhao a chalyusapa a châ. 9 Abeipa ao cha ôkâ thozy chaneisa ta, Râhmâhpazy chanaoh ta, Chyhsa to ta a Achhyna o liata, “Rônahna to mawh sy!” ama tah. 10 Abeipa cha tipaua chô liata bei ta a tyuh ta, Abeipa cha tlyzaw ta bei ta a tyuhpa a châ. 11 Abeipa ta a phopi hnohta thatlôna pie sala, Abeipa ta a phopi hnohta thlalôhna byhnâ pie mawh sy! |