HLAZY 28 - Mara Bible RV (BSI)

Ei thatlôna nata ei vyhphao

Dâvi Hla

¹ Hy Abeipa, cha pado na ta, Hy ei lôpanô, kei lâta na nah pâ khah sy; Chataleipatala, einâ chalihsai khiah chi ta cha, Khaohtlô liata a tlapa hawhta ei châ pathlei aw na.

² Na baona hiapa ta cha pado na ta, Na su pathaih chaipa lâ ei kuzy ei pazawh tita, Zawngiahna ei châ hiana ao thei mah y.

³ Moleipazy hry liata nâ daophi pathlah leipa la, Hmoparaopazy hry liata nâ daophi pathlah khah y; Cha chyhsazy cha ama vaihzy hnohta adyhna bie reih ei ta, Ama palôh liata deikua mo­leina ta a bie tyh.

⁴ Ama hriapa lymâ hawhta âmo cha pie la, Moleina hmo ama taopa lymâ hawhta âmo cha thô mah y; Ama ku raihria lymâ hawhta âmo cha thô la, Ama lymâ dao awpa pie mah y.

⁵ Abeipa raihriazy pachâ leipa ei ta, A ku raihriazy ama pachâ leipa vâta, Âmo cha parao aw ta, Paduapathi heih khao aw vei.

⁶ Ei hiana ao a thei hapa vâta, Abeipa cha reithaipa ta y mawh sy!

⁷ Abeipa cha ei thatlôna nata ei vyhphao châ ta, Ei palôh ta ano cha ngâ ta, eina bao tyh; Ei palôh a ly kaw ta, Reithaina hla ano lâ ei hlâ tyh.

⁸ Abeipa cha a chyhsazy thatlôna châ ta, A sathawthupa châta pachhana thokhy a châ.

⁹ Na phopi he pachha la, Na ryuto he byhnâ pie mah y; Âmo cha pasa la, Chhâzaw ta hrôbieh mah y.