Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

HLAZY 27 - Mara Bible RV (BSI)


Abeipa khaihna nata pachhana
Dâvi Hla

1 Abeipa cha ei khaihna nata ei pachhana châ ta, Ahy ei chi aw? Abeipa cha ei hrona thokhy châ ta, Ahy ei chi aw?

2 Hmoparaopazy nâ vyhnao ei ta, Ei sapa nie khai amâ chhuah; Ei chariahpa nata ei khakhaipazy cha, Âmo tlao a chapia ei ta ama pao.

3 Pheisaihzy ta riehmo na paryh thlu hra ei sala, Ei palôh dua leipa aw ta; Adyuhna ta na vaw tlô thlu hra sala, Ei ngâh thlâh ha aw.

4 Abeipa liata hmo miakha hiah na ta, Cha hmo cha khâ ei tlua aw; Cha cha ei hro chhôh noh zydua liata Abeipa o liata pahrâ ta, Abeipa angianazie sai ta, Achhyna o liata thlahchhâ awpa a châ.

5 Nôpona noh liata a o liata na nyu aw ta, A poh o ta na chhôhkhâhpa ta, Lôpanô chô liata eina patyu aw.

6 Nâ chadôtuhpa ei chariahpazy chô lâ ta, Ei luh chaluahpa ta y aw ta; Abeipa poh o liata, A lypa ta awh aw na ta, atheihna ei hlâ aw.

7 Hy Abeipa, ao paropa ta ei cha aw tita, na thei la, Na ngiachhie la, nâ chhy mah y!

8 “Ei hmia na tlua muh vy,” tah chi ta, “Hy Abeipa, na hmia tlai cha ei tlua,” tahpa ta, Ei palôh ta a cha chho.

9 Hy nâ bao tyhtuhpa y, Keima tawhta na hmia nyu leipa la, Châ chakaotuhpa he hiehâhpa ta na pakuasa khah y. Hy ei pachhana Khazohpa y, Na thy leipa la, na siesai khah y!

10 Ei nô nata ei paw ta na siesai ei ta, Châhrasala Abeipa ta a o lâ einâ chhi aw.

11 Hy Abeipa, ei chariahpazy vâna heta, Na lâpi na pachu la, Lâthlôh a raihpa liata nâ chhi mah y.

12 Ei khakhaipazy khopa lâta na hlâ khah y; Pahnokheituh pakheipazy ta na thyuhnao ei ta, Nôchhiena hu eina so thlu ei.

13 Ahrohpa râh liana heta, Abeipa phana ei hmô aw tahpa ei ngiapâ.

14 Abeipa cha hâ la, Thatlôpa ta y mah y! Abeipa cha hâ la, Riahphapa ta y mah y!

The Bible Society of India

© 2023, Used by permission. All rights reserved.

Bible Society of India
ကြှနျုပျတို့နောကျလိုကျပါ:



ကြော်ငြာတွေ