HLAZY 26 - Mara Bible RV (BSI)Ngâchhihna palâhâhna Dâvi Hla 1 Hy Abeipa, ei dona hrokhei na ta, Tleisai leipa ta Abeipa ei ngâ hapa vâta, Thai na pachâsa mah y. 2 Hy Abeipa, nâ chupa ta na mohpasia la, Ei pathipalôh nata ei pachâna pasia mah y. 3 Na ngâchhihna ei hmiakô liata y ta, Na biehmeiseihpa liata a hrohpa ei châ. 4 Chyhsa doleipazy hnohta a tyuh leipa na ta, Phapakheipazy a pakyh veih ei na. 5 Moleipazy pakhypi pasi na ta, Hmoparaopazy hnohta a tyuh aw va na. 6 Ei kuzy he seina hnei lei awpa ta a sipa ta, Hy Abeipa, na maisâh chahlô aw na ta; 7 Alyna biereina tlâh awhpa ta, Na hmotao noâhpa zydua ei chho aw. 8 Hy Abeipa, na yna o tlaichhai kaw na ta, Na rônahna pahrâna su ei tlaichhai ngaita. 9 Ei thlahpa he moleipazy hry ta pahleipadia leipa la, Ei hrona he thisaih palo hmâhpa chyhsazy hry ta pahleipadia khah y. 10 Cha hawhpazy ku liata hmo chhiepa tao achhuahna y ta, Ama ku chachâh lâ panaopapanazy ta a bie. 11 Kei deikua cha, ei dona ta hroh aw na ta, Na chatlai la, na ngiachhie mah y. 12 Ei phei he su bypa liata a duah ta, Pakhypi rônahpa liata Abeipa cha ei reithai aw. |