HLAZY 2 - Mara Bible RV (BSI)

Abeipa sathawthupa abeina

¹ Khazia râhzy ama ruchhô ta, Phopizy ta hraoleipa ta ama tei tly?

² Lei beizy amâ duana su liata a duah ei ta, Ryureituhpazy a hmaohpakhypa ta, Abeipa a dyuh awpa ta ryhrao khoh ei ta, A sathawthupa a dyuh awpa ta amâ paraoh.

³ “Ama bâliazy he chhie sih la, Ama keihraizy he thy ei suh u,” ama tah.

⁴ Vâ beidyuchhai liata a tyuhpa cha pahneih ta, Abeipa ta a pahneisao ei.

⁵ A pathi iapa ta ama hnohta bie reih aw ta, A hiehâhpa ta âmo pachisapa ta,

⁶ “Ei tlâh pathaihpa Zaio tlâh liata, Ei Beipa ei patyusa haw,” a tah aw.

⁷ Bieraopa ei phuah aw: Abeipa ta ei hnohta, “Ei sawchapawpa châ chi ta, Tanoh he na paw ei châ haw.

⁸ Na hiah la, phopizy he na ryuto châta cha pie aw na ta, Khizaw kaokih zydua na ryuto ta ei cha pie aw.

⁹ Thua chôchahrei ta âmo cha tuchheih aw chi ta, Alei beih hawhta a tlawh ta na taichheih aw ei,” eina tah.

¹⁰ Chavâta Hy beizy saih u, So bâ u la, Lei ryureituhpazy saih u, Pachuna a pyh bâ muh vy.

¹¹ China chôta Abeipa chakao u la, Achalyuna chôta thaphapa ta y teh u.

¹² Sawchapawpa cha pahnâ teh u, Chataleipatala a hiehâh aw ta, Lâpi liata nama leidia pathlei aw na, A pathi thlai ia tyh tlôh ta. Abeipa a chhaipa zydua cha ama nohlao na.