HLAZY 17 - Mara Bible RV (BSI)

Khazohpa mathlaw nohdi liata

Dâvi thlahchhâna

¹ Hy Abeipa, adona bie thei la, Ei cha awna he nathlie mah y! Dôveina a y leipa ei hmao tawhta thlahchhâna lâ Na nah pachôh mah y!

² Ei thaichâna nâma tawhta vaw tlô sala, Na mo ta adona hmô mawh sy!

³ Ei palôh na moh chi ta, Zâ ta eina vaw tly chi; Na pasia chi ta, Khâpa hmah hmô va chi; Ei pakah ta molei lei awpa ta khâchâ ei chhuah haw.

⁴ Chyhsapa hmotaopazy kyh liata, Na hmao tawhta bie vâta, Thachahra hmâna lâpizy ei khôkhâh haw.

⁵ Ei keih chakâpazy ta na lâpizy khâchâ a chhih ta, Ei pheizy a chapia beih vei.

⁶ Hy Khazohpa, cha aw na ta, Einâ chhy aw chi; Kei lâta na nah pachôh la, Ei biezy thei mah y.

⁷ Hy nâma châ chhaipazy pachhatuhpa y, Na ngâchhihna cha na hmotao noâhpazy liata palâsa la, Na ku chachâh lâta ama chariahpazy tawhta pachha mah y.

⁸ Na mosaw hawhta na vaih la, Na mathlaw nohdi ry liata na nyu mah y.

⁹ Nâ paraotuhpa moleipazy tawhta na nyu la, Nâ chadôpa chariah chichhihpazy tawhta na nyu mah y.

¹⁰ Thapasana kyh liata ama palôhzy khaw ei ta, A khotlâh kawpa ta ama pakah ta bie ama reih tyh.

¹¹ Tahmâ cha eima lâchakâna zydua miah dôh ha ei ta, Alei liata papao awpa ta ama mo miah ama tawpâ.

¹² Sa tai awpa a ngiatiah leipa Chakeibarôhneipa hawhta châ ei ta, Sa tai awpa a byhpa Chakeibarôhneipa lochopa hawhta ama châ.

¹³ Hy Abeipa, thyu la, Ano cha a heihnaopa ta panawh la, Ei hrona he moleipazy tawhta na zaozi ta pachha mah y.

¹⁴ Hy Abeipa, cha hawhpa chyhsazy tawhta na ku ta na pachha la, Hro chhôh ta tovyuh a hneipa khizaw chyhsazy tawhta na pachha mah y. Ama chhi cha ryusôhpazy ta pabie chi ta, Palôhtlâhna taihta sawzy hnei ei ta, Ama hneinazy cha sawzy châta ama siesai tyh.

¹⁵ Kei deikua la, siana ta na hmia sai aw na ta, Ei hra tita, Na hmia hmô aw na ta ei palôh a tlâh aw.