HLAZY 149 - Mara Bible RV (BSI)

Abeipa lâta hla thiehpa sa teh u

¹ Abeipa cha reithai teh u! Abeipa lâta hla thiehpa sa u la, Mopathaihpazy pakhypi liata a reithaina hla sa teh u!

² Izarei cha a Taotuhpa chô liata a thapha sala, Zaio sawzy cha ama Beipa chô liata a ly mawh ei sy!

³ Lâpa ta a moh reithai ei sala, Khoh nata totâ chhaota ano reithaipa ta sa mawh ei sy!

⁴ Abeipa cha a phopi chô liata a palôh tlâh ta, Areisipazy cha pachhana ta a palyupalih ei.

⁵ Mopathaihpazy cha rônahna liata a ly ei sala, Ama rakhôzy chô liata thaphapa ta hla sa mawh ei sy.

⁶ Khazohpa reithaina ao cha ama rao liata y sala, Zaozi kârano ta a tiah raihriepa cha ama ku liata y mawh sy.

⁷ Râhzy chô liata phuh la aw ei ta, Phopizy ama hrie aw.

⁸ Ama beizy bâlia paky aw ei ta, Ama nôpawpazy thua keihrai daipa ta,

⁹ Pachiana bie ro chiehpa hawhta, Phopizy cha ama pachia aw. Cha cha a mopathaihpa zydua châta rônahna a châ aw. Abeipa cha reithai teh u!