HLAZY 146 - Mara Bible RV (BSI)

Lei beizy liata a pahnieh lei awpa

¹ Abeipa cha reithai teh u! Hy ei thlahpa, Abeipa cha reithai mah y!

² Ei hro chhôh zydua ta Abeipa cha reithai aw na ta, Husona ei hnei chhôh ta, Ei Khazohpa reithaina hla ei sa aw.

³ Abeizy a ngâchhâ leipa la, Chyhsa sawzy chhao a ngâchhâ khah y, Ano liata pachhana y vei.

⁴ A hu ta a puasai tita, Chhaohlei lâ kua heih ta; Cha noh lia tlai chata â chhuahnazy a lei pâ haw.

⁵ Zakaw Khazohpa cha baotuhpa ta hnei ta, Abeipa a Khazohpa liata hnabeiseihna a hneipa cha, A hu â hieh na!

⁶ Abeipa cha avâ nata alei taotuhpa châ ta, Tilaipi nata a chhôh liata a ypa zydua a taotuhpa chhao châ ta, Tlyzaw ta biehmeiseihpa a vao thlâhpa a châ.

⁷ Tlybaipazy châta adona a duakheituhpa châ ta, Nodipazy nie awpa a pietuhpa a châ. Abeipa cha atâhpazy papua ta,

⁸ Mochaopazy mo a pavâsa. Abeipa cha a bôhpazy pathyu ta, Abeipa cha mosiapazy kyh a pachâ.

⁹ Abeipa cha mapaihpazy vaih ta, Nôhmei nata paw hnei leipazy a deichhy tyh; Hmoparaopazy hro deikua cha, Âbôkalie lâta a paysa tyh.

¹⁰ Abeipa cha tlyzaw ta ryureih aw ta, Hy Zaio, na Khazohpa cha chhâ zydua ta ryu a reih aw. Abeipa cha reithai teh u!