HLAZY 145 - Mara Bible RV (BSI)

Abeipa rônahna reithaina

Dâvi Reithaina Hla

¹ Hy ei Khazohpa nata ei Beipa, Cha palyupali aw na ta, Chhâzaw nata tlyzaw ta na moh ei reithai aw.

² Noh to ta cha reithai aw na ta, Chhâzaw nata tlyzaw ta na moh ei reithai aw.

³ Abeipa cha rônah ta, Rônahpa ta reithai awpa a châ; A rônahzie cha, A laichadai khai thei rimâ awpa châ vei.

⁴ Chhâ kha tawhta chhâ hropa lâta, Na hmotaopazy reithai pachhuah lymâ aw ei ta, Na hmotao rônahpazy ama phuah lymâ aw.

⁵ Nâ beina rônahzie nata ngiazie reih aw na ta, Na hmotao noâhpazy ei reih tyh aw.

⁶ Na hmotaopa thatlôzie nata rarôh yzie reih aw ei ta, Kei chhao ta na rônahzie ei phuah aw.

⁷ Na phana hluhzie reih aw ei ta, Na siana kyh hla ta ama sa aw.

⁸ Abeipa cha ngiachhiena nata zawngiahna a hneipa châ ta, Hiehâhna kyh liata nainô sôpa châ ta, Kyhpachâna tleih beih leipa ta a biepa a châ.

⁹ Abeipa cha mo to chô liata pha ta, A zawngiahna cha a hmotaopa zydua chô liata a y.

¹⁰ Hy Abeipa, na hmotaopa zydua ta alyna bie cha hlâ aw ei ta, Na mopathaihpa zydua ta ama cha reithai aw.

¹¹ Na khinarâh rônahzie reih aw ei ta, Na hmotaotheina kyh ama chho aw.

¹² Chyhsa sawzy hnohta na hmotao rônahpazy pahnosa aw ei ta, Na khinarâh rônahzie nata ngiazie ama pahnosa aw.

¹³ Na khinarâh cha tlyzaw khinarâh châ ta, Na ryureina chhâ zydua ta â duah aw. Abeipa cha a bie zydua liata ngâ a chhih ta, A hmotaopa zydua liata a phapa a châ.

¹⁴ Abeipa cha a pao awpa zydua patu ta, A bôhpa zydua a pathyu tyh.

¹⁵ Mokhaoh to ta cha mokhâh ei ta, A daihti ta nie awpa na pie tyh ei.

¹⁶ Na ku pakai chi ta, Hmohrohneipa to khopa lôhrâ na patlô tyh.

¹⁷ Abeipa cha a yzie zydua liata sia ta, A hmotaopa zydua liata ngâchhihpa a châ.

¹⁸ Abeipa cha a padotuhpa zydua a hnia ta, Hmeiseihpa ta a padotuhpa zydua a hniapa a châ.

¹⁹ Ano a chituhpazy khopa hlao patloh tyh ta, Ama awna ao thei ta a pachha tyh ei.

²⁰ Abeipa cha ano kyh a pachâtuhpa zydua pabohsa ta, Hmoparaopazy deikua cha, A pahleipadia aw ei.

²¹ Ei pakah ta Abeipa reithaina bie a reih tyh aw; Chyhsa zydua ta a moh pathaihpa cha, Chhâzaw nata tlyzaw ta reithai mawh ei sy.